അവൾ സുന്ദരി

അവളുടെ വശ്യഭംഗി ആരെയും ആകർഷിക്കാൻ പോന്നതായിരുന്നു ;

തിളക്കമാർന്ന കരിനീല കണ്ണുകളും, ഇക്കിളിക്കൊഞ്ചൽ പോലുള്ള ചിരിയും, മിനുസമായ മേനിയും , ഹൃദ്യമായ നനുത്ത ഗന്ധവും അവൾക്കു പൂർണ്ണതയേകി.

ഒരേയൊരു നോക്കുകൊണ്ടു കാഴ്ചക്കാരൻറെ ഹൃദയധമനിയിലേക്കിരച്ചു കയറി പ്രതിഷ്ഠ നേടിയെടുക്കുന്നവൾ ;

എത്ര വർണ്ണിച്ചാലും വറ്റാതെ ഒഴുകുന്ന സൗന്ദര്യത്തിനുറവ.

മഹാ കവികളുടെ തൂലികകൾക്കു പോലും പൂർണത ചോരാതെ ഒപ്പിയെടുക്കാനാവാത്ത രൂപഭംഗിക്കുടമ.

കലാഹൃദയങ്ങളുടെ ആത്മാവിനെ ആഴത്തിൽ തൊട്ടുണർത്തി അവരുടെ ഹൃദയതാളുകളിലെ ഒരേട് എന്നെന്നേക്കുമായി സ്വന്തമാക്കിയ അപ്സരകന്യക .

സർവ്വാലങ്കാരവിഭൂഷിതയായി, കണ്ണഞ്ചിപ്പിക്കും വെള്ളിവെളിച്ചത്തെ സാക്ഷിയാക്കി, ശബ്ദഘോഷങ്ങളോടുകൂടെ താളത്തിൽ ആർത്തിരമ്പി പെയ്തിറങ്ങിയാലും ,

ഒരു കുഞ്ഞു ചാറ്റൽ മഴയായി രൂപപ്പെട്ടു നിന്റെ കണികകൾ ഓരോ ഇലനാമ്പുകളിലും പതിപ്പിച്ചു, മരച്ചില്ലകളിലൂടെ പതിയെ ഒലിച്ചിറങ്ങി നീയി ഭൂമിയെ സ്പർശിച്ചാലും,

പെണ്ണേ , നീയെപ്പോഴും സുന്ദരിയാണ് ;

വിണ്ണിൽ നിന്നും മണ്ണിലേക്ക് മഴയായിറങ്ങിവന്ന നീയെന്നുമൊരു അത്ഭുതപ്രതിഭാസമാണ് ,

അവർണ്ണനീയമായ സൗന്ദര്യമാണ് .

—————————————————————————————————————————————-

മഴ എപ്പോഴും അങ്ങനെയാണല്ലോ . എത്ര നോക്കിനിന്നാലും മതിയാവാതെ വീണ്ടും വീണ്ടും ആസ്വദിക്കാൻ തോന്നും . ഓരോ ജലകണികയും നിലത്തേക്ക് പതിക്കുമ്പോൾ ഉള്ളിൽ എന്നുമൊരു ആർദ്രതയാണ് . വേദനകളെപ്പോലും മായ്ചുകളയാൻ ചിലപ്പോൾ മഴയ്ക്കു സാധിക്കാറുണ്ട് . നമ്മുടെ സങ്കടത്തിൽ നമ്മോടൊപ്പം കരഞ്ഞുതീർക്കാനായി ചിലപ്പോൾ മഴയും കൂട്ടുവരാറുണ്ട്.

ഇരുണ്ടുകൂടിയ മഴമേഘങ്ങൾക്കിടയിലൂടെ പമ്മിപ്പതുങ്ങി കൊച്ചു കൊച്ചു തുള്ളികളായി പെയ്തൊഴിയുന്ന മഴത്തുള്ളികളുടെ കുറുമ്പിനെ ഞാൻ ആസ്വദിക്കാറുണ്ട്.

ഞാൻ മഴയെ ഒരുപാട് സ്നേഹിക്കുന്ന മഴയുടെ കൂട്ടുകാരി.

—————————————————————————————————————————————-

ഒരു പരീക്ഷണമെന്ന രീതിയിൽ എഴുതിയതാണ്. തെറ്റുകുറ്റങ്ങളുണ്ടെങ്കിൽ ക്ഷമിക്കുക. നിങ്ങളുടെ അഭിപ്രായങ്ങൾ തീർച്ചയായും അറിയിക്കണം. നിങ്ങളുടെ വിലയിരുത്തലിലൂടെ ഞാൻ എന്റെ കുറവുകൾ തിരുത്തി അടുത്ത തവണ കൂടുതൽ മെച്ചപ്പെട്ട രചനയുമായി മടങ്ങി വരാം.

About Author

പുതിയ നോവലുകളും കഥകളും ദിവസവും ഇന്‍ബോക്‌സില്‍ ലഭിക്കാന്‍ ന്യൂസ് ലെറ്റർ സബ്‌സ്‌ക്രൈബ് ചെയ്യാം

Email Address

Subscribe