കൈവിട്ടുപോകുന്ന മനസ്സിനെ നിയന്ത്രണത്തിൽ കൊണ്ടുവരാൻ ആയി ഞാൻ എന്റെ കണ്ണുകൾ ഇറുക്കിയടച്ചു . എന്നിട്ട് പതിയെ ശ്വാസം എടുക്കാൻ ശ്രമിച്ചു . അപ്പോഴാണ് , നിലത്തു കിടന്നിരുന്ന എന്റെ ഫോൺ വീണ്ടും റിംഗ് ചെയ്തത് . ഫോണിലെ ഡിസ്പ്ലേയിൽ കണ്ട പേരിലേക്ക് തന്നെ ഞാൻ നോക്കി നിന്നു ………………………..
“”” ആർമി കോളിംഗ് “”””
ആർമിയുടെ ഫോൺ എടുക്കാൻ പറ്റിയ ഒരു മാനസികാവസ്ഥയിൽ അല്ലായിരുന്നു ഞാൻ . അതുകൊണ്ട് തന്നെ അവന്റെ കോൾ ഞാൻ അറ്റൻഡ് ചെയ്തില്ല . അല്പസമയത്തിനുശേഷം എന്റെ ഫോണിലേക്ക് ഹരി മാമയുടെ കോൾ വീണ്ടും വന്നു .
” ഹലോ , അമ്മുട്ട്യേ ”
” എന്താ ഹരി മാമേ ? ”
” നീ എന്താ മോളെ ഫോൺ കട്ട് ചെയ്തത് ? ”
” ഒന്നും ഇല്ല മാമേ ”
” നീ ഒന്നുകൊണ്ടും പേടിക്കേണ്ട , നിന്റെ പപ്പയ്ക്ക് നീ ഇപ്പോൾ എവിടെയാണെന്ന് അറിയില്ല . നിന്റെ പപ്പ ഇന്ത്യയിലേക്ക് വന്നു എന്ന് ശരിയാണ് . പക്ഷേ അത് നീ എവിടെയാണ് എന്ന് അറിയാതെയാണ് വന്നത് ”
” എന്ന് ഹരിമാമ യോട് ആരാ പറഞ്ഞത് ? ”
” നീ എവിടെയാണുള്ളത് എനിക്കല്ലാതെ മറ്റാർക്കും അറിയില്ല ”
” ഒരു പക്ഷേ ഇന്നലെവരെ അത് ശരിയായിരിക്കും . എന്നാൽ ഇന്ന് അങ്ങനെയല്ല ”
” നീ ഇതെന്തൊക്കെയാണ് പറയുന്നത് ”
” അത് ഹരി മാമേ , പപ്പക്ക് ഞാൻ എവിടെയാണെന്ന് നന്നായിട്ട് അറിയാം ”
” എന്ത് !!!!!!! ”
” പപ്പ എല്ലാം അറിഞ്ഞിട്ടും തന്നെയാണ് നാട്ടിലേക്ക് വന്നത് ”
” മോളെ നിന്നോട് ഇതൊക്കെ ആരാ പറഞ്ഞത് ? ”
” ഹരി മാമേ , എന്റെ പപ്പയെ എനിക്കറിയില്ലേ , പപ്പാ നാട്ടിൽ കാലുകുത്തിയതിന്റെ സൂചനയാണ് കൃഷ്ണദാസ് ചെറിയച്ഛന്റെ ചേട്ടൻ രാംദാസിന്റെ മിസ്സിംഗ് ”
” നീ ഇത് എന്തൊക്കെയാണ് അമ്മൂട്ടി പറയുന്നത് ”
” സത്യമാണ് ഹരിമാമേ , പപ്പാ നാട്ടിലെത്തിയിട്ടുണ്ട് . എന്റെ മനസ്സ് പറയുന്നത് പപ്പ എന്റെ ഓരോ ചലനങ്ങളും വീക്ഷിച്ചുകൊണ്ടിരിക്കുന്നുണ്ടെന്നാണ് ”
” മോളെ , ഇനി എന്താ ചെയ്യുക ? നീ ഇവിടെ എന്തിന് വന്നു എന്ന് നിന്റെ പപ്പ ചോദിച്ചാൽ നിനക്ക് പറയാൻ ഉത്തരമുണ്ടോ ? ”
” അതിന് ഞാൻ പപ്പയുടെ ചോദ്യങ്ങൾക്ക് ഉത്തരം കൊടുത്താൽ അല്ലേ , പപ്പ എന്തായാലും എന്നെ തിരക്കി ഇവിടെ വരും . അതെനിക്ക് നൂറ് ശതമാനം ഉറപ്പാണ് ”
” ഇനി എന്താ നിന്റെ പ്ലാനിങ് ? ”
” തൽക്കാലം ഒരു പ്ലാനിങ്ങും ഇല്ല , പക്ഷേ ഞാനൊരു തീരുമാനമെടുത്തു . ”
” എന്ത് ??????? ”
” അതൊക്കെ വഴിയെ അറിയാം . എന്നാൽ ശരി മാമേ , ഞാൻ പിന്നെ വിളിക്കാം ”
” ഹലോ ശ്രുതി , മോളെ ഹലോ , …….. ”
ഹരിമാമ എന്താണ് പറയാൻ വരുന്നത് എന്ന് എനിക്ക് നന്നായി അറിയാവുന്നതുകൊണ്ട് മാമയുടെ മറുപടിക്ക് കാത്തു നിൽക്കാതെ ഞാൻ ഫോൺ കട്ട് ചെയ്തു . ഓരോ തവണയും ഹരിമാമ യോട് സംസാരിച്ചു കഴിയുമ്പോൾ മനസ്സു മുഴുവൻ ശാന്തമായിരുന്നു . എന്നാൽ ഇന്ന് അശാന്തമായിരുന്നു മനസ്സിലേക്ക് ഹരിമാമ തീക്കനൽ വാരിയിട്ടത് പോലെയായി . എന്റെ മനസ്സിൽ അസ്വസ്ഥതയുടെ കരിനിഴൽ വീണു .
മനസ്സിന്റെ സമനില തെറ്റിക്കുന്ന രീതിയിൽ പപ്പയുടെ മുഖം എന്റെ മനസ്സിൽ തെളിഞ്ഞു വന്നു . പപ്പയുടെ സ്വഭാവം എനിക്ക് വളരെ നന്നായി അറിയാം . എന്നെ അന്വേഷിച്ച് പപ്പ ഇവിടെ വന്നാൽ …………… ഹോ എനിക്ക് ഓർക്കാൻ പോലും വയ്യ . ഞാൻ ചിന്തിക്കുന്നതിലും അപ്പുറമായിരിക്കും അതിന്റെ ഭവിഷ്യത്ത് .
പെട്ടെന്ന് എന്റെ ചിന്തകൾക്ക് വിരാമമിട്ടു കൊണ്ടാണ് ആർമിയുടെ കോൾ വീണ്ടും എന്റെ ഫോണിലേക്ക് വന്നത് . ആദ്യം കോൾ കട്ട് ചെയ്യാൻ ആണ് എനിക്ക് തോന്നിയതെങ്കിലും ആർമിയുടെ കോൾ അറ്റൻഡ് ചെയ്യാനാണ് എന്റെ മനസ്സ് എന്നോട് പറഞ്ഞത് . അതിനാൽ തന്നെ മനസ്സു പറഞ്ഞതുപോലെ ഞാൻ ചെയ്തു . ഞാൻ ആർമിയുടെ കോൾ അറ്റൻഡ് ചെയ്തു .
” ഹലോ ശ്രുതി , ഞാൻ എത്ര നേരമായി വിളിക്കുന്നു , താൻ ഇത് എവിടെയായിരുന്നു ? ”
” അത് … ഞാൻ … കുറച്ചു ബിസിയായിരുന്നു . എന്താ അഭിയേട്ട കാര്യം ? ”
ആദ്യം അഭിയേട്ടൻ എന്നോട് എന്തോ പറയാൻ ശ്രമിച്ചെങ്കിലും , പിന്നീട് അൽപനേരം മൗനം തുടർന്നു . അതിനുശേഷം മറ്റെന്തൊക്കെയോ പറഞ്ഞൊപ്പിച്ച പോലെ തോന്നി എനിക്ക് . അഭിയേട്ടന്റെ മനസ്സും അസ്വസ്ഥം ആണെന്ന് ആ വാക്കുകളിൽ നിന്നു തന്നെ വ്യക്തമാണ് .
” ഹലോ അഭിയേട്ട , എന്തെങ്കിലും പ്രശ്നമുണ്ടോ ? ”
” എന്ത് പ്രശ്നം , ഒന്നുമില്ലല്ലോ ശ്രുതി . ഞാൻ ആകെ ബോറടിച്ചിരിക്കുകയായിരുന്നു . അപ്പോഴാണ് തന്റെ മുഖം മനസ്സിലേക്ക് വന്നത് അപ്പൊ എന്തുകൊണ്ടോ തന്നോട് സംസാരിക്കണം എന്ന് തോന്നി . അതുകൊണ്ടാണ് വിളിച്ചത് ”
” ശരിക്കും അതുതന്നെയാണോ കാര്യം ”
” അതെ …….. ”
” ശരി ഞാൻ വിശ്വസിച്ചു . ”
” താനെന്താടോ ഇങ്ങനെ ഞാൻ സത്യം പറഞ്ഞതാ ”
” അത് തന്നെയാ ഞാനും പറഞ്ഞത് , വിശ്വസിച്ചുന്ന് ”
” ഓ ആയിക്കോട്ടെ , എന്തുവാ പരിപാടി ”
” നമ്മുക്കൊക്കെ എന്ത് പരിപാടി , പ്രത്യേകിച്ചൊന്നുമില്ല . അവിടെ എന്താണാവോ പരിപാടി ? ”
” കുറച്ചു ലോങ്ലേക്ക് ഒരു ട്രിപ്പ് പോയാലോ എന്ന് ആലോചിക്കുകയാണ് , എന്താ കൂടെ പോരുന്നോ ? ? ”
” വന്നാൽ കൊണ്ടുപോവുമെങ്കിൽ കൂടെ വരാം ? ”
പെട്ടെന്ന് എന്നിൽനിന്നും അങ്ങാനൊരു മറുപടി അഭിയേട്ടൻ ഒട്ടും പ്രതീക്ഷിച്ചിട്ടുണ്ടായിരുന്നില്ല എന്ന് അഭിയേട്ടന്റെ പെട്ടെന്നുള്ള മൗനത്തിൽ നിന്നും എനിക്ക് മനസ്സിലായി . തമാശയിലൂടെ വളരെ സീരിയസ് ആയി തന്നെയാണ് ഞാനത് ചോദിച്ചത് . പക്ഷേ , മറുപടിയായി ലഭിച്ച മൗനം എന്നെ വല്ലാതെ നിരുത്സാഹപ്പെടുത്തി . പെട്ടെന്നാണ് എന്നെ ഞെട്ടിച്ചു കൊണ്ട് അഭിയേട്ടൻ സംസാരിക്കാൻ തുടങ്ങിയത് .
” കൂടെ വരാൻ തയ്യാറാണെങ്കിൽ കൊണ്ടു പോകാം ഞാൻ അങ്ങ് ദൂരേക്ക് ”
ചിരിക്കണോ കരയണോ എന്നറിയാത്ത ഒരു നിർവികാരമായ അവസ്ഥയിലായിരുന്നു ഞാൻ . പോകണം , പോയേ പറ്റൂ . എന്നെ അന്വേഷിച്ചു ഇവിടെ ആൾ എത്തുന്നതിനുമുമ്പ് എനിക്കിവിടം വിടണം . ഞാൻ കാരണം ഇവിടെ ആർക്കും ഒരു പ്രശ്നമുണ്ടാവാരുത് .
” ഹലോ ശ്രുതി താൻ ഒന്നും പറഞ്ഞില്ല ”
” ഞാൻ വരാം , ഇന്ന് രാത്രി തന്നെ . ഒരു പന്ത്രണ്ട് മണിയാകുമ്പോൾ എന്നെ കൂട്ടാൻ വരണം . സ്ഥലം ഞാൻ വാട്സപ്പിൽ ടെക്സ്റ്റ്‌ ചെയ്യാം . ”
” ശ്രുതി ആർ യു സീരിയസ് ??? ”
പതറിയ ശബ്ദത്തോടെയാണ് അഭിയേട്ടൻ എന്നോട് ചോദിച്ചത് . എന്നാൽ എന്റെ സ്വരം ഉറച്ചതായിരുന്നു .
” യെസ് ”
( തുടരും )
Read complete ശ്രുതി Malayalam online novel here
Related posts:
About Author
Unlock Your Imagination: Start Generating Stories Now! Generate Stories
Get all the Latest Online Malayalam Novels, Stories, Poems and Book Reviews at Aksharathalukal. You can also read all the Latest Stories in Malayalam by following us on Twitter and Facebook
പുതിയ നോവലുകളും കഥകളും ദിവസവും ഇന്‍ബോക്‌സില്‍ ലഭിക്കാന്‍ ന്യൂസ് ലെറ്റർ സബ്‌സ്‌ക്രൈബ് ചെയ്യാം
Hey, I'm loving Kuku FM app 😍
You should definitely try it. Use my code LPLDM59 and get 60% off on premium membership! Listen to unlimited audiobooks and stories.
Download now
©Copyright work - All works are protected in accordance with section 45 of the copyright act 1957(14 of 1957) and shouldnot be used in full or part without the creator's prior permission