കലിപ്പന്റെ ജീവിതം മാറ്റിമറിച്ചതാര്?

കലിപ്പൻ ചെക്കനും💕 മാലാഖ പെണ്ണും♥️ – ഇതൾ 🌷🌷

Love, Suspense, GOLDEN PEN 26 · 51 അധ്യായങ്ങൾ

📖 ഈ കഥയുടെ മുഴുവൻ അധ്യായങ്ങളും അക്ഷരത്താളുകളിൽ വായിക്കാം →

അധ്യായം 1 – കലിപ്പൻ ചെക്കനും💕 മാലാഖ പെണ്ണും♥️

കല്ലുപോലെയുള്ള അവന്റെ മനസ്സിനെ സ്നേഹം കൊണ്ട് തോൽപ്പിക്കാൻ ഒരു മാലാഖ എത്തുന്നു!

പാർട്ട് -1

പച്ചപ്പട്ടുടുത്ത പാടവരമ്പുകളും, കുളിർമയുള്ള കൈത്തോടുകളും നിറഞ്ഞ ‘പുതുശ്ശേരി’ ഗ്രാമം ശാന്തമായി ഉണർന്നു കഴിഞ്ഞിരുന്നു.

 ഇടതൂർന്നു നിൽക്കുന്ന തെങ്ങിൻതോപ്പുകൾക്കിടയിലൂടെ അരിച്ചെത്തുന്ന പുലർകാല സൂര്യന്റെ കിരണങ്ങൾ ആ നാടിന് ഒരു പ്രത്യേക ഭംഗി നൽകിയിരുന്നു. പക്ഷികളുടെ കളകൂജനങ്ങളും ദൂരെയുള്ള ക്ഷേത്രത്തിൽ നിന്നുള്ള ഭക്തിഗാനങ്ങളും അന്തരീക്ഷത്തിൽ അലിഞ്ഞുചേർന്നിട്ടുണ്ട്.

​പേര് ദേവൻ എന്നാണെങ്കിലും മൂപ്പരുടെ സ്വഭാവം കുറച്ച് കടുപ്പമാണ്, നാട്ടുകാർക്ക് അവൻ ‘കലിപ്പൻ’ ദേവനാണ്.

നല്ല ആറടിപ്പൊക്കം, ജിമ്മിൽ പോയി ഇരുമ്പ് പോലെ ഉറപ്പിച്ച എടുത്തുപറയേണ്ട ശരീരം, വിടർന്ന കാന്തശക്തിയുള്ള കണ്ണുകളും അതിന് ചേർന്ന കട്ടി മീശയും. കണ്ടാൽ ഏതൊരു പെൺകുട്ടിയും ഒന്നുകൂടി നോക്കിപ്പൊകുന്ന അത്രയും സുന്ദരൻ.

 ആൺകുട്ടികൾക്ക് അവനെപ്പോലെ ആകാനാണ് ആഗ്രഹം. പക്ഷേ, ആ മുഖത്ത് എപ്പോഴും ഒരു ഗൗരവമുണ്ടാകും. കാര്യമില്ലാതെ ആരോടും സംസാരിക്കില്ല, ആവശ്യമില്ലാത്ത ഒന്നിനും തലയിടുകയുമില്ല.

 നാട്ടിലെ യുവാക്കൾ കൂട്ടം കൂടി നിന്ന് വർത്തമാനം പറയുമ്പോൾ ദേവൻ അതിലൊന്നും പങ്കുചേരാതെ തന്റെ വഴിയേ പോകും. അനാവശ്യമായി ആരെങ്കിലും ചൊറിയാൻ വന്നാൽ പിന്നെ മുന്നിൽ നിൽക്കുന്നവൻ ആരായാലും ദേവൻ നോക്കില്ല. അടിപിടിയിലും അല്പം മുൻപന്തിയിലാണ്. അതുകൊണ്ട് തന്നെ നാട്ടുകാരും വീട്ടുകാരും അവനെ സ്നേഹത്തോടെയും ഒപ്പം അല്പം ഭയത്തോടെയുമാണ് വീക്ഷിക്കാറുള്ളത്.

​നാട്ടിലെ വലിയൊരു തീയേറ്ററിന്റെയും കല്യാണമണ്ഡപത്തിന്റെയും ഒപ്പം ഏക്കർ കണക്കിന് വരുന്ന റബ്ബർ തോട്ടങ്ങളുടെയും ഒക്കെ ചുമതല ദേവനാണ്. ചെറുപ്പത്തിൽ തന്നെ കാര്യപ്രാപ്തിയുള്ളവനായതുകൊണ്ട് മാധവൻ നായർക്ക് ബിസിനസ്സ് കാര്യങ്ങളിലൊന്നും കൂടുതൽ തലപുകയ്ക്കേണ്ടി വരാറില്ല. എല്ലാം ദേവൻ കൃത്യമായി നോക്കി നടത്തും. എങ്കിലും മകന്റെ ഈ കടുപ്പക്കാരൻ സ്വഭാവത്തിൽ വീട്ടുകാർക്ക് ചെറിയൊരു വിഷമമുണ്ട്.

​അന്ന് വെളുപ്പിനെ അഞ്ചര കഴിഞ്ഞതേയുള്ളൂ. മുറ്റത്തെ കാഞ്ഞിരമരത്തിൽ കാക്കകൾ കരഞ്ഞുതുടങ്ങി.
ദേവൻ തന്റെ മുറിയിൽ നിന്നും എഴുന്നേറ്റ് താഴേക്ക് വന്നു. വെള്ള മുണ്ടും കറുത്ത ഫുൾ സ്ലീവ് ഷർട്ടുമാണ് വേഷം. കൈമടക്കുകൾ കൃത്യമായി മുകളിലേക്ക് തെറുത്തുവെച്ചിട്ടുണ്ട്. മുടി പിന്നിലേക്ക് ഒതുക്കി ചീകി, നല്ല സുഗന്ധമുള്ള പെർഫ്യൂമും അടിച്ച് അവൻ ഇറയത്തേക്ക് വന്നു. കട്ടിലിൽ കിടന്ന ബുള്ളറ്റിന്റെ കീ എടുത്ത് വിരലിലിട്ട് കറക്കിക്കൊണ്ടാണ് അവൻ നടന്നത്.

​ഉമ്മറത്തെ ചാരുകസേരയിലിരുന്ന് പത്രം വായിക്കുകയായിരുന്ന മാധവൻ നായർ മകന്റെ ഈ ഒരുക്കവും ഭാവവും കണ്ടു. കണ്ണട അല്പം മൂക്കിലേക്ക് ഇറക്കിവെച്ച് അദ്ദേഹം മകനെ നോക്കി ചോദിച്ചു:

​”ദേവാ… നീയിത് എങ്ങോട്ടാ ഈ വെളുപ്പാൻകാലത്ത് പോകുന്നത്  ഇന്ന് ഞായറാഴ്ചയല്ലേ, കുറച്ചുനേരം കൂടി ഉറങ്ങാമായിരുന്നില്ലേ”

​ദേവൻ നടപ്പ് നിർത്തി അച്ഛന്റെ മുന്നിൽ വന്നു നിന്നു. ആ മുഖത്ത് പതിവുപോലെ യാതൊരു ഭാവവ്യത്യാസവുമില്ലായിരുന്നു. ശബ്ദത്തിൽ പതിവ് ഗാംഭീര്യം നിറച്ചു അവൻ പറഞ്ഞു:

​”ഞാൻ തീയേറ്റർ വരെ ഒന്നു പോകുവാ അച്ഛാ. അവിടെ പുതിയ പ്രൊജക്ടറും സൗണ്ട് സിസ്റ്റവും ഫിറ്റ് ചെയ്യുന്നത് ഇന്ന് രാവിലെയാണ്. ചെന്നൈയിൽ നിന്ന് വന്ന എഞ്ചിനീയർമാർ അവിടെ എത്തിയിട്ടുണ്ട്. ഞാൻ കൂടെ നിന്നില്ലെങ്കിൽ അവർ പണി വിചാരിച്ചതുപോലെ തീർക്കില്ല.”

​മാധവൻ നായർ പത്രം മടക്കി മേശപ്പുറത്ത് വെച്ചു. മകന്റെ മുഖത്തേക്ക് നോക്കി അദ്ദേഹം അല്പം ഗൗരവത്തിലും എന്നാൽ വാത്സല്യത്തോടെയും സംസാരിക്കാൻ തുടങ്ങി:

​”അതിനൊക്കെ അവിടെ കാര്യസ്ഥൻ നാണുവും തീയേറ്റർ മാനേജരും ഒക്കെ ഉണ്ടല്ലോടാ. നീയിങ്ങനെ എപ്പോഴും ജോലി, പണം, ഗൗരവം എന്ന് പിടിച്ച് നടന്നാൽ മതിയോ? ജീവിതത്തിൽ ഇതൊന്നും മാത്രമല്ല ഉള്ളത്. നിനക്കിപ്പോൾ വയസ്സ് ഇരുപത്തിയേഴായി. നിന്റെ പ്രായത്തിലുള്ള നാട്ടിലെ ചെക്കന്മാരൊക്കെ കല്യാണം കഴിഞ്ഞ് കുട്ടികളുമായി നടക്കുന്നു. ഒരു കല്യാണം കഴിച്ച് ഈ തറവാട്ടിലേക്ക് ഒരു പെൺകുട്ടിയെ കൊണ്ടുവന്ന് ഈ വീടൊന്ന് ഉഷാറാക്കാൻ നോക്ക്. നിന്റെ അമ്മയാണെങ്കിൽ ഒരു നല്ല മരുമകളെയും കാത്ത് പൂജാമുറിയിൽ നിന്ന് ഇറങ്ങുന്നില്ല. എന്നും ഭഗവാന്റെ മുന്നിൽ കണ്ണീരൊഴുക്കലാ അവളുടെ പണി.”

​അച്ഛന്റെ സംസാരം കേട്ടതും ദേവന്റെ കട്ടിപ്പുരികങ്ങൾ പാതി ചുളിഞ്ഞു. അവന് ഇത്തരം ഉപദേശങ്ങൾ ഒട്ടും താല്പര്യമില്ലാത്ത കാര്യമാണ്. കല്യാണം എന്ന വാക്ക് കേൾക്കുമ്പോൾ തന്നെ അവന്റെ ഉള്ളിൽ ഒരുതരം വിരക്തിയാണ് തോന്നാറുള്ളത്. സ്വന്തം സ്വാതന്ത്ര്യത്തിലേക്ക് മറ്റൊരു പെൺകുട്ടി കടന്നുവരുന്നതിനെക്കുറിച്ച് അവൻ ചിന്തിച്ചിട്ടുപോലുമില്ലായിരുന്നു.

​”എനിക്ക് ഇപ്പോൾ കല്യാണം വേണ്ട അച്ഛാ. ഞാൻ അത് പലവട്ടം പറഞ്ഞിട്ടുള്ളതാണ്. ഇനി അതിനെപ്പറ്റി പറഞ്ഞ് രാവിലെ തന്നെ എന്റെ മൂഡ് കളയരുത്. എനിക്ക് അവിടെ ഒരുപാട് പണിയുണ്ട്,” ശബ്ദത്തിൽ അല്പം കടുപ്പം കൂട്ടി അത്രയും പറഞ്ഞ് ദേവൻ തിരിഞ്ഞു നടന്നു.

​മുറ്റത്തേക്ക് ഇറങ്ങി, തന്റെ പ്രാണനായ കറുത്ത റോയൽ എൻഫീൽഡ് ബുള്ളറ്റിനടുത്തേക്ക് അവൻ നടന്നു. ബുള്ളറ്റ് സ്റ്റാർട്ടാക്കി അതിന്റെ ആ ഗംഭീരമായ ശബ്ദം തറവാടാകെ മുഴങ്ങി കേട്ടു. ആ ശബ്ദം കേട്ടാണ് അടുക്കളയിൽ ചായ തിളപ്പിച്ചുകൊണ്ടിരുന്ന അമ്മ ലക്ഷ്മിയമ്മ വേഗത്തിൽ ഉമ്മറത്തേക്ക് ഓടിവന്നത്.

 പക്ഷേ, അപ്പോഴേക്കും ദേവൻ ഗേറ്റ് കടന്ന് മെയിൻ റോഡിലേക്ക് ബുള്ളറ്റ് തിരിച്ചുപോയിരുന്നു. വണ്ടിയിൽ പോകുമ്പോഴും അവന്റെ മനസ്സ് അസ്വസ്ഥമായിരുന്നു.
​ലക്ഷ്മിയമ്മ ഉമ്മറത്തെ തൂണിൽ ചാരിനിന്ന് പോകുന്ന മകനെ നോക്കി ഒരു ദീർഘശ്വാസം എടുത്തു.

​”നിങ്ങൾ വീണ്ടും അവനോട് ആ കാര്യം സംസാരിച്ചോ മനുവേട്ടാ?” ലക്ഷ്മിയമ്മ മാധവൻ നായരെ നോക്കി സങ്കടത്തോടെ ചോദിച്ചു.

​”പിന്നെ ചോദിക്കാതെങ്ങനാ ലക്ഷ്മി.  അവന് പ്രായം കൂടിവരികയല്ലേ. ഇപ്പോഴും ആ പഴയ ദേഷ്യവും വാശിയും ഒട്ടും കുറഞ്ഞിട്ടില്ല. ആരെങ്കിലും പെണ്ണ് ചോദിച്ചാൽ മുഖത്ത് നോക്കി വേണ്ടെന്ന് പറയും. ഇങ്ങനെ പോയാൽ ഇവനെയൊരു പെണ്ണും കെട്ടാൻ കിട്ടില്ല,” മാധവൻ നായർ നിസ്സഹായതയോടെ പറഞ്ഞു.

​ലക്ഷ്മിയമ്മ പൂജാമുറിയിലെ വിളക്കിന് മുന്നിലേക്ക് നടന്നു. കൈകൾ കൂപ്പി കണ്ണുകൾ അടച്ച് അവർ പ്രാർത്ഥിച്ചു:

 “എന്റെ ഗുരുവായൂരപ്പാ… ഇവന്റെ ഈ കല്ലുപോലെയുള്ള മനസ്സിനെ ഒന്നു മാറ്റിയെടുക്കാൻ നിനക്കേ കഴിയൂ.
 സ്നേഹിക്കാൻ മാത്രം അറിയുന്ന, ഇവന്റെ ദേഷ്യത്തെ താങ്ങാൻ പറ്റുന്ന നല്ലൊരു പാവം പെൺകുട്ടിയെ എന്റെ മകന്റെ ജീവിതത്തിലേക്ക് നീ എത്തിച്ചു കൊടുക്കണേ.”

​അമ്മയുടെ ആ പ്രാർത്ഥന ഭഗവാൻ കേട്ടതുപോലെ, ദേവന്റെ ആ കല്ലുപോലെയുള്ള മനസ്സിനെ അലിയിക്കാൻ തക്കവണ്ണം ഒരാൾ ആ തറവാട്ടിലേക്ക് വരാൻ ഒരുങ്ങുന്നുണ്ടായിരുന്നു. ദേവന്റെ ദേഷ്യത്തെ സ്നേഹം കൊണ്ട് തോൽപ്പിക്കാൻ പോകുന്ന ആ മാലാഖ ആരായിരിക്കും എന്ന് വീട്ടുകാർക്ക് അപ്പോൾ ഒരു സൂചനയും ഇല്ലായിരുന്നു.

​ഗ്രാമത്തിലെ റോഡിലൂടെ ബുള്ളറ്റ് പായിക്കുമ്പോഴും, അന്ന് വൈകുന്നേരം തറവാട്ടിൽ നടക്കാൻ പോകുന്ന വലിയൊരു മാറ്റത്തെക്കുറിച്ച് ദേവനും അറിഞ്ഞിരുന്നില്ല. കലിപ്പനായ ദേവന്റെ ജീവിതത്തിലെ പ്രണയകാലത്തിന്റെ തുടക്കമായിരുന്നു അത്.

​(തുടരും…)

📖 കഥ തുടരാം

“കലിപ്പൻ ചെക്കനും💕 മാലാഖ പെണ്ണും♥️”ന്റെ അടുത്ത അധ്യായങ്ങൾ
അക്ഷരത്താളുകളിൽ വായിക്കൂ →

CONTINUE READING

📱 അക്ഷരത്താളുകൾ ആപ്പിൽ വായിക്കൂ

• ✓ കൂടുതൽ സൗകര്യപ്രദമായ വായന
• ✓ പുതിയ അധ്യായങ്ങൾ കണ്ടെത്താം
• ✓ ഏകദേശം 7 MB മാത്രം

OPEN ANDROID APP

✍️ എഴുതി വരുമാനം നേടൂ

നിങ്ങളുടെ കഥകളും നോവലുകളും അക്ഷരത്താളുകളിൽ പ്രസിദ്ധീകരിക്കൂ. വായനക്കാരിലേക്ക് എത്തിച്ച് നിങ്ങളുടെ എഴുത്തിലൂടെ വരുമാനം നേടാം.

ഇപ്പോൾ എഴുതിത്തുടങ്ങൂ →

✍️ ഇതൾ 🌷🌷-ന്റെ കൂടുതൽ കഥകൾ →