മരണത്തിന്റെ അഗാധതയിൽ നിന്ന്…

ജീവംശമായ് – UMMUFARHATH

Love, Thriller · 30 അധ്യായങ്ങൾ

📖 ഈ കഥയുടെ മുഴുവൻ അധ്യായങ്ങളും അക്ഷരത്താളുകളിൽ വായിക്കാം →

അധ്യായം 1 – ജീവാംശമായ്….♥️

പ്രണയം ഒരു ജീവൻ രക്ഷകനാകുമോ? ആദിഷും ജാൻവിയും ഒന്നാകുമോ?

---

” എടാ…  ആദി … നിന്റെ ജാൻവിക്കുട്ടിയതാ  അവിടെ…. “

ആദി എന്ന ആദിഷിനോട് നിഹാൽ കുസൃതി ചിരിയോടെ  വിളിച്ചു പറഞ്ഞു …

” എവിടെ …?? “

അത് കേട്ടതും വെള്ളത്തിൽ  മുങ്ങി കിടക്കുന്നിടത്തു നിന്നും പെട്ടെന്ന് ഉയർന്നു കൊണ്ട്  ആകാംക്ഷയോടെ ആദി ചോദിച്ചു…

” അതാ അവിടെ കുറെ പെൺകുട്ടികളെ കാണുന്നില്ലേ  ,  അതിൽ ആ പാറക്കെട്ടിൽ ഇരിക്കുന്നത് അവളാ…. “

സുമേഷ് പറഞ്ഞത് കേട്ടപ്പോൾ ആദിയുടെ വിടർന്ന കണ്ണുകൾ  ഒന്നുകൂടി വിടർന്നു , അവനങ്ങോട്ട് നോട്ടമെയ്തു  കൊണ്ട് വെള്ളത്തിൽ കഴുത്തു വരെ മുങ്ങി കൊണ്ട് അങ്ങനെ കുറച്ചു നേരം നിന്നു…

വൈകുന്നേരത്തെ ഫുട്ബോൾ കളി കഴിഞ്ഞു വിസ്‌തരിച്ചൊന്നു കുളിക്കാൻ വന്നതാണ് ആദിയും കൂട്ടുകാരും … അവർക്ക് അതെന്നും ഒരു പതിവാണ് .. 

എല്ലാവരും  സെന്റ് മേരീസിൽ ഡിഗ്രി ലാസ്റ്റ് ഇയർ സ്റ്റുഡൻസാണ്…  അവരുടെ കോളേജിലെ തന്നെ ഫസ്റ്റ് ഇയർ സ്റ്റുഡന്റാണ് ജാൻവി , അവളെ കുഞ്ഞു നാൾ മുതൽ ആദിക്ക് ഭയങ്കര ഇഷ്ടമാണ് , അവനുള്ളിൽ പ്രണയ വികാരം മൊട്ടിട്ട സമയം മുതൽ  അവളാണ് അവന്റെ സ്വപ്നത്തിലെ പെണ്ണ്… ഒരേ നാട്ടുകാരാണ് അവർ രണ്ടും … ചെക്കന് ചങ്കിൽ കയറിയ ക്രഷ് ആണേലും അവളോട് പറഞ്ഞപ്പോ  അനുകൂലമായി അവളൊരു മറുപടി പറയാത്തത് കൊണ്ട്  പിന്നാലെ നടക്കാനൊന്നും അവൻ മെനെക്കെട്ടില്ല…  കോളേജിൽ മിന്നും താരം , കോളേജിൽ മാത്രമല്ല നാട്ടിലെ തരുണീ മണികൾക്ക്  പോലും സ്വപ്നകുമാരനാണ് നമ്മുടെ ആദി …  

അവൻ നാട്ടിലെ പ്രമുഖമായ പുരാതന ജന്മി കുടുംബത്തിലെ വാസു ദേവന്റെയും കൃഷ്ണ പ്രഭയുടെയും  ഇളയ സന്തതിയാണ് , രണ്ടു ചേട്ടന്മാരുടെയും  രണ്ടു ചേച്ചിമാരുടെയും പൊന്നാര അനിയൻ … ആ നാട്ടിലെ ഒട്ടുമിക്ക   കൃഷിയിടങ്ങളും  അവന്റെ തറവാട്ടിലെയാണ് …  

അവളാകട്ടെ നാട്ടിൽ ഓട്ടോ ഓടിച്ചു ജീവിക്കുന്ന  സുധീഷിന്റെ മൂന്നു പെൺകുട്ടികളിൽ  മൂത്തവൾ … ആ വീടിന്റെ സ്വപ്‌നങ്ങൾ അവളിലൂടെ പൂവണിയാനാണ് അവളുടെ കുടുംബം കാത്തിരിക്കുന്നത്… അതുകൊണ്ടുതന്നെ അവളാ പ്രണയം  അക്‌സെപ്റ്റ് ചെയ്തില്ല …

” എടീ … ജാനീ….  നീ ഇങ്ങനെ പാറയിൽ ഇരിക്കാനാണോ ഇങ്ങോട്ട് വന്നത് , ഇങ്ങോട്ട് വെള്ളത്തിലേക്കിറങ്ങേടീ … “

വർഷ  ജാൻവിയെ  വിളിച്ചു കൊണ്ട്  പറഞ്ഞു … 

” പോടീ … എനിക്ക് പേടിയാ… എനിക്ക് നീന്തൽ അറിയില്ലെടീ … “

ജാൻവി പേടിയോടെ പറഞ്ഞു …

” ഇവിടെ അതിന് മാത്രം ആഴം ഒന്നുമില്ല … നീ ഇങ്ങോട്ടിറങ്ങ് … “

വെള്ളത്തിൽ നിന്നും കരയിലേക്ക് കയറി കൊണ്ട്  വർഷ ജാൻവിയുടെ കൈ പിടിച്ചു വലിച്ചു …  പെട്ടെന്നുള്ള വലിയിൽ  ജാൻവി വെള്ളത്തിലേക്ക് വീണു….

​വെള്ളത്തിലേക്ക് വീണ ജാൻവിയുടെ നിലവിളി തൊണ്ടക്കുഴിയിൽ തന്നെ കുടുങ്ങിപ്പോയി . അപ്രതീക്ഷിതമായ വീഴ്ചയിൽ നാസാരന്ധ്രങ്ങളിലേക്ക് ഇരച്ചു കയറിയ വെള്ളം അവളെ ശ്വാസം മുട്ടിച്ചു .

​” അയ്യോ… ജാനീ…  “

​വർഷയുടെ തമാശ പെട്ടെന്നൊരു നിലവിളിയായി മാറി . കരയോട് ചേർന്നുള്ള ഭാഗത്ത് അധികം ആഴമില്ലാതിരുന്നിട്ടും , വീണ വെപ്രാളത്തിൽ ജാൻവിക്ക് നില കിട്ടിയില്ല . അവൾ കൈകാലിട്ടടിച്ചു . വെള്ളത്തിന് മുകളിൽ പൊങ്ങിക്കിടക്കാൻ അവൾ നടത്തിയ ശ്രമങ്ങളെല്ലാം പരാജയപ്പെട്ടു പോയി .

​പാറക്കെട്ടുകൾക്ക് താഴെ വെള്ളത്തിന് നല്ല ഒഴുക്കുണ്ടായിരുന്നു . പുറമെ ശാന്തമായി ഒഴുകുന്ന പുഴയുടെ അടിത്തട്ടിൽ ചുഴികൾ ഒളിഞ്ഞിരിപ്പുണ്ടെന്ന് ആരും ഓർത്തില്ല . ജാൻവിയുടെ ഭാരമില്ലാത്ത ശരീരം ആ ഒഴുക്കിലേക്ക് വഴുതി മാറി .

​” ആദീ… !! “

​മറുഭാഗത്ത് നിന്നും നിഹാലിന്റെ അലർച്ച കേട്ടപ്പോഴാണ് ആദി ഞെട്ടിത്തിരിഞ്ഞത് . അപ്പോഴേക്കും ജാൻവി ഒഴുക്കിലേക്ക് പെട്ടുപോയിരുന്നു . അവളുടെ കൈകൾ മാത്രം ഇടയ്ക്കിടെ വെള്ളത്തിന് മുകളിൽ ഉയർന്നു കണ്ടു . ഒരു നിമിഷം… വെറും ഒരു നിമിഷം ആദിയുടെ ഹൃദയം നിലച്ചു പോയി . തന്റെ പ്രാണൻ ആഴങ്ങളിലേക്ക് താഴ്ന്നു പോകുന്നത് കണ്ടപ്പോൾ , ചോര മരവിച്ചു പോകുന്ന ഒരവസ്ഥ .
​അടുത്ത നിമിഷം അവനൊരു അസ്ത്രം പോലെ വെള്ളത്തിലേക്ക് കുതിച്ചു .

​” ജാനീ… “

​ആദിയുടെ തൊണ്ട പൊട്ടിപ്പൊളിയുന്ന ആ നിലവിളി പുഴയുടെ ഓളങ്ങളിൽ തട്ടി പ്രതിധ്വനിച്ചു . കൂട്ടുകാരായ സുമേഷും നിഹാലും പുറകെ ചാടിയെങ്കിലും , ആദിയുടെ വേഗതയ്ക്ക് മുന്നിൽ എത്താൻ അവർക്കായില്ല . കാലുകാൾക്ക് ചിറക് മുളച്ചതുപോലെ അവൻ വെള്ളത്തെ കീറിമുറിച്ചു നീന്തി .

​ജാൻവിക്ക് ബോധം മറഞ്ഞു തുടങ്ങിയിരുന്നു . കണ്ണുകളിൽ ഇരുട്ട് കയറുന്നു . മൂക്കിലൂടെയും വായിലൂടെയും വെള്ളം ഉള്ളിലേക്ക് കടന്ന് ശ്വാസകോശം നീറുന്നു . ‘ അമ്മേ….. ‘ എന്ന് വിളിക്കാൻ പോലും കഴിയാതെ അവൾ നിസ്സഹായയായി . മരണഭയം അവളെ വരിഞ്ഞു മുറുക്കി . താൻ പതിയെ താഴേക്ക് പോവുകയാണെന്നും , ചുറ്റും തണുപ്പ് മാത്രമാണെന്നും അവൾ തിരിച്ചറിഞ്ഞു .
​ആദി സർവ്വ ശക്തിയുമെടുത്ത് നീന്തുകയായിരുന്നു . വെള്ളത്തിന് മുകളിൽ കണ്ടിരുന്ന അവളുടെ മുടിയിഴകൾ താഴുന്നത് കണ്ടപ്പോൾ അവന് ഭ്രാന്ത് പിടിക്കുന്ന അവസ്ഥയായി . 

‘ ഇല്ല… ഒന്നും സംഭവിക്കില്ല.. ഞാൻ സമ്മതിക്കില്ല… ‘
അവൻ മനസ്സിൽ മന്ത്രിച്ചു കൊണ്ടിരുന്നു .
​ഒടുവിൽ  ഒരുവിധം അവൻ അവൾക്ക് അരികിലെത്തി . വെള്ളത്തിനടിയിലേക്ക് ഊളിയിട്ട് അവൻ അവളുടെ കയ്യിൽ പിടുത്തമിട്ടു . മരണവെപ്രാളത്തിൽ ആയിരുന്ന ജാൻവി , ആദിയുടെ കയ്യിൽ പിടുത്തം കിട്ടിയതും അവനെ വരിഞ്ഞു മുറുക്കാൻ ശ്രമിച്ചു . അത് അവനെ കൂടി താഴ്ത്തുമെന്ന് മനസ്സിലാക്കിയ ആദി , ബലമായി അവളെ തിരിച്ചിട്ടു . തന്റെ ഇടതുകൈ കൊണ്ട് അവളുടെ അരയിലൂടെ ചുറ്റിപ്പിടിച്ച് , തല വെള്ളത്തിന് മുകളിലേക്ക് ഉയർത്തിപ്പിടിക്കാൻ അവൻ പാടുപെട്ടു .

​ഒഴുക്ക് ശക്തമായിരുന്നു . ഓരോ തവണ നീന്തുമ്പോഴും പുഴ അവരെ പിന്നിലേക്ക് വലിച്ചു കൊണ്ടിരുന്നു . ആദിയുടെ കൈകൾക്ക് വേദന തോന്നിത്തുടങ്ങിയിട്ടും , നെഞ്ചിൽ ചേർത്തു പിടിച്ചിരിക്കുന്ന ആ ജീവനെ വിടാൻ അവൻ തയ്യാറായില്ല .

​” പേടിക്കണ്ട ജാനീ… ഞാനുണ്ട്… ഞാനുണ്ട് കൂടെ… “

​അബോധാവസ്ഥയിലേക്ക് വഴുതി വീഴുന്ന അവളോട് അവൻ കിതപ്പോടെ വിളിച്ചു പറഞ്ഞു കൊണ്ടിരുന്നു . അപ്പോഴേക്കും നിഹാലും സുമേഷും അടുത്തെത്തിയിരുന്നു. അവരുടെ സഹായത്തോടെ ആദി അവളെ കരയിലേക്ക് അടുപ്പിച്ചു . പാറക്കെട്ടുകൾ നിറഞ്ഞ കരയിലേക്ക് അവളെ എടുത്തു കിടത്തുമ്പോൾ ആദിയുടെ കൈകൾ വിറയ്ക്കുന്നുണ്ടായിരുന്നു . അവൻ കിതച്ചു കൊണ്ട് അവളുടെ മുഖത്തേക്ക് നോക്കി. വിളറിയ മുഖം . അടഞ്ഞ കണ്ണുകൾ .

​”  ജാനീ…     ജാനീ…    മോളെ…  
കണ്ണ് തുറക്കെടീ… “

​ആദി അവളുടെ കവിളിൽ തട്ടി വിളിച്ചു . പ്രതികരണമില്ല . ചുറ്റും കൂടി നിന്ന പെൺകുട്ടികൾ ഭയം കൊണ്ട് വിറയ്ക്കുകയായിരുന്നു . വർഷ കരഞ്ഞു കൊണ്ട് ജാൻവിയുടെ കാലിൽ പിടിച്ചിരുന്നു .

​”  എനിക്ക്… എനിക്ക് പറ്റിയതാ… ഞാൻ ചുമ്മാ അവളെ… ” 

വർഷയുടെ വാക്കുകൾ തൊണ്ടയിൽ കുരുങ്ങി പോയി . ​ആദി ആരുടെയും മുഖത്തേക്ക് നോക്കിയില്ല . അവൻ ജാൻവിയുടെ നെഞ്ചിൽ അമർത്തി സിപിആർ (CPR) നൽകാൻ തുടങ്ങി . അവന്റെ കണ്ണുകളിൽ നിന്നും വെള്ളം ഇറ്റിറ്റു വീണ് അവളുടെ മുഖത്ത് പതിച്ചു കൊണ്ടിരുന്നു .

​” ജാനീ… പ്ലീസ്… ഒന്ന് കണ്ണ് തുറക്ക്… ” അവന്റെ ശബ്ദം ഇടറി . ആ വലിയ ആൾക്കൂട്ടത്തിന് നടുവിലും അവൻ ഒറ്റയ്ക്കായതുപോലെ . തന്റെ ജീവൻ തിരിച്ചു കിട്ടാൻ വേണ്ടി പ്രാർത്ഥിക്കുന്ന ഒരവസ്ഥ .
​പെട്ടെന്നാണ് ജാൻവി ഒന്ന് ചുമച്ചത് .
​ആദിയുടെ മുഖത്ത് ആശ്വാസത്തിന്റെ ഒരു വെളിച്ചം മിന്നി . അവൾ വശത്തേക്ക് തിരിഞ്ഞ് വായിൽ നിന്നും വെള്ളം ഛർദ്ദിച്ചു കളഞ്ഞു . ആദി അവളെ താങ്ങിപ്പിടിച്ചു . അവൾ പതിയ കണ്ണുകൾ തുറന്ന് ചുറ്റും നോക്കി . 

കാഴ്ചകൾ മങ്ങിക്കാണുന്നു . പക്ഷെ, തൊട്ടുമുന്നിൽ നിറഞ്ഞ കണ്ണുകളോടെ , നനഞ്ഞു കുതിർന്ന് ഇരിക്കുന്ന ആദിയുടെ മുഖം മാത്രം അവൾ വ്യക്തമായി കണ്ടു .
​അവന്റെ കണ്ണുകളിലെ ഭയം… അത് വെറുമൊരു പരിചയക്കാരന്റെ ഭയമായിരുന്നില്ല . നഷ്ടപ്പെട്ടു പോകുമെന്ന് കരുതിയ അമൂല്യമായതെന്തോ തിരിച്ചു കിട്ടിയവന്റെ ആശ്വാസമായിരുന്നു അത് .

​” ആ… ആദി ഏട്ടാ… ” 

അവൾ നേർത്ത ശബ്ദത്തിൽ വിളിച്ചു .
​അത് കേട്ടതും ആദിക്ക് നിയന്ത്രണം വിട്ടു
പോയി . അവൻ അവളെ ഇറുകെ പുണർന്നു . ചുറ്റും നിൽക്കുന്നവരെയോ , സ്ഥലത്തെയോ അവൻ മറന്നു പോയിരുന്നു . ആ നിമിഷം സത്യത്തിൽ അവൻ കരയുകയായിരുന്നു .

​” പേടിപ്പിച്ചു കളഞ്ഞില്ലേടീ നീ എന്നെ… ചങ്ക് പറിഞ്ഞു പോയടി… ” 

അവൻ അവളുടെ ചെവിയിൽ മന്ത്രിച്ചു . അവന്റെ നെഞ്ചിടിപ്പ് അവളുടെ മുതുകിലൂടെ അവൾക്ക് അനുഭവപ്പെടാമായിരുന്നു .
​അല്പനേരത്തിന് ശേഷം , ബോധം വീണ്ടെടുത്തപ്പോഴാണ് താൻ ആദിയുടെ നെഞ്ചോട് ചേർന്നിരിക്കുകയാണെന്ന സത്യം ജാൻവി തിരിച്ചറിഞ്ഞത് . അവൾ മെല്ലെ അകന്നു മാറാൻ ശ്രമിച്ചു . ആദിയും പെട്ടെന്ന് സ്വബോധത്തിലേക്ക് മടങ്ങി . അവൻ അവളെ വിട്ട് അല്പം മാറി ഇരുന്നു .
​വർഷ ഓടി വന്ന് ജാൻവിയെ കെട്ടിപ്പിടിച്ചു കരഞ്ഞു .

​” സോറി ജാനീ… ഞാൻ… ഞാൻ  വെറുതെ നിന്നെ തമാശയ്ക്ക്… “

​ജാൻവി ക്ഷീണിച്ച ഒന്ന് ചിരിച്ചു .

” സാരമില്ലെടീ… എനിക്കൊന്നും പറ്റീല്ലല്ലോ… “
​പക്ഷെ ആദിയുടെ മുഖം ഗൗരവത്തിലായിരുന്നു . അവൻ വർഷയെ രൂക്ഷമായി ഒന്ന് നോക്കി .

​” തമാശയൊക്കെ ആവാം വർഷാ … പക്ഷെ സ്ഥലം നോക്കണം . നീന്തലറിയാത്ത ഒരാളെ വെള്ളത്തിലേക്ക് തള്ളിയിടുമ്പോൾ മിനിമം ബോധം വേണമായിരുന്നു . ഇന്ന് ഇവൾക്ക് എന്തെങ്കിലും പറ്റിയിരുന്നെങ്കിൽ… “

​ആദി പാതിവഴിയിൽ നിർത്തി . ബാക്കി പറയാൻ അവന് ത്രാണിയില്ലായിരുന്നു .
​ജാൻവി ആദിയെ തന്നെ നോക്കി ഇരിക്കുകയായിരുന്നു . നാട്ടിലെ വലിയ പണക്കാരൻ , എല്ലാവരും ബഹുമാനത്തോടെ കാണുന്ന വാസുദേവൻ മുതലാളിയുടെ മകൻ . തന്നോട് ഇഷ്ടമാണെന്ന് പറഞ്ഞിട്ടുണ്ടെങ്കിലും , അതെല്ലാം വെറും ഒരു നേരം പോക്കാണെന്നാണ് അവൾ കരുതിയിരുന്നത് . പക്ഷെ ഇന്ന്… ആ പുഴയുടെ ആഴങ്ങളിൽ വെച്ച് തന്നെ വരിഞ്ഞു മുറുക്കിയ ആ കൈകൾക്ക് , കരയിൽ വെച്ച് തന്റെ ജീവന് വേണ്ടി പിടഞ്ഞ ആ കണ്ണുകൾക്ക്… അതിനൊക്കെ പ്രണയത്തിന്റെ നിറമായിരുന്നു .

​” വാ… ഇനി ഇവിടെ നിൽക്കണ്ട… ഇരുട്ടി തുടങ്ങി… “

സുമേഷ് ഇടപെട്ടു .ആദി എഴുന്നേറ്റു . അവൻ ജാൻവിയോട് കൈ നീട്ടി .

​” എഴുന്നേൽക്കാൻ പറ്റുമോ അതോ എടുക്കണോ…? “
​ആ ചോദ്യത്തിൽ കുസൃതിയായിരുന്നില്ല , മറിച്ച് കരുതലായിരുന്നു ഉണ്ടായിരുന്നത് . ജാൻവി അവന്റെ കൈ പിടിച്ചു പതിയെ എഴുന്നേറ്റു . അവളുടെ കാലുകൾ വിറയ്ക്കുന്നുണ്ടായിരുന്നു . ആദി അവളെ ചേർത്തു പിടിച്ചു .

​” പേടിക്കണ്ട… വണ്ടി വരെ ഞാൻ പിടിച്ചോളാം…”
​അവർ നടന്നു നീങ്ങുമ്പോൾ , പിന്നിൽ പുഴ ശാന്തമായി ഒഴുകുന്നുണ്ടായിരുന്നു . പക്ഷെ അവരുടെ മനസ്സിൽ അതൊരു വലിയ കൊടുങ്കാറ്റ് ഉണ്ടാക്കിയിരുന്നു . ജാൻവി ഇടയ്ക്കിടെ ആദിയെ ഒളികണ്ണിട്ടു നോക്കി . വെള്ളം ഒലിച്ചിറങ്ങുന്ന ആ മുഖത്ത് , അവളെ സുരക്ഷിതയാക്കിയതിന്റെ ഗർവ്വ് ഉണ്ടായിരുന്നില്ല , മറിച്ച് ഇനിയും ബാക്കിയുള്ള ഭയമായിരുന്നു .
​വണ്ടിയിൽ കയറുന്നതിന് മുൻപ് ആദി അവളുടെ അരികിലെത്തി .
​” വീട്ടിൽ വിടണോ…? “
​” വേണ്ട… ഹോസ്റ്റലിലേക്ക് പൊയ്ക്കോളാം… വാർഡൻ അറിഞ്ഞാൽ പ്രശ്നമാകും… “

​” ശരി… ചെന്നിട്ട് വിളിക്കണം . എന്റെ നമ്പർ കയ്യിലുണ്ടോ …?? മരുന്നെന്തെങ്കിലും വേണമെങ്കിൽ പറയണം… “
​അവൾ തലയാട്ടി. കാർ സ്റ്റാർട്ട്‌ ചെയ്ത് കൂട്ടുകാർക്കൊപ്പം പോകുമ്പോഴും ആദിയുടെ കണ്ണുകൾ റിയർവ്യൂ മിററിലൂടെ ജാൻവിയെ തന്നെ നോക്കുന്നുണ്ടായിരുന്നു.
​അവൾ കൂട്ടുകാരികൾക്കൊപ്പം സ്കൂട്ടിയിൽ നീങ്ങുമ്പോഴും , തന്റെ ജീവൻ തിരിച്ചു നൽകിയ ആ സ്പർശനം… അതവളെ വിട്ടു പോയിരുന്നില്ല . ഒരുപക്ഷെ, ജാൻവിക്ക് ആദിഷിനോടുള്ള പ്രണയത്തിന്റെ യഥാർത്ഥ തുടക്കം ആ പുഴയുടെ ആഴങ്ങളിൽ നിന്നായിരുന്നു . മരണം മുന്നിൽ കണ്ട നിമിഷത്തിൽ , രക്ഷകനായി എത്തിയവനോടുള്ള ആരാധനയല്ല, മറിച്ച് തന്നെ ജീവനുതുല്യം സ്നേഹിക്കുന്ന ഒരുവനോടുള്ള തിരിച്ചറിവായിരുന്നു അത് .

​അന്ന് രാത്രി , ഹോസ്റ്റൽ മുറിയിൽ കിടക്കുമ്പോൾ ജാൻവിക്ക് ഉറക്കം വന്നില്ല . ജനലിലൂടെ പുറത്തേക്ക് നോക്കി കിടക്കുമ്പോൾ അവളുടെ മനസ്സിൽ നിറയെ ആദിയായിരുന്നു . കുസൃതിച്ചിരിയോടെ വരുന്ന ആദിഷല്ല , കലങ്ങിയ കണ്ണുകളോടെ ” പേടിപ്പിച്ചു കളഞ്ഞില്ലേടീ ” എന്ന് ചോദിച്ച ആദിഷ് .

​ആദിക്ക് അപ്പോഴും സമാധാനം ലഭിച്ചിരുന്നില്ല . വീട്ടിലെത്തിയിട്ടും , കുളിച്ചിട്ടും, ഭക്ഷണം കഴിക്കുമ്പോഴും അവന്റെ ഉള്ളിൽ ആ ഭയം തിരയടിക്കുകയായിരുന്നു . തന്റെ കൈകളിൽ നിന്നും വഴുതി അവൾ ആഴങ്ങളിലേക്ക് പോയിരുന്നെങ്കിൽ…? ചിന്തിക്കാൻ പോലും അവന് വയ്യായിരുന്നു .
​ഫോൺ എടുത്തു ‘ജാൻവി’ എന്ന എന്നോ സേവ് ചെയ്തു വെച്ച കോൺടാക്റ്റിലേക്ക് നോക്കി അവൻ കുറെ നേരം ഇരുന്നു . വിളിക്കണോ? വേണ്ട , അവൾ ക്ഷീണിച്ചു ഉറങ്ങുകയാവും .

​പെട്ടെന്ന് ഫോൺ ബെല്ലടിച്ചു. സ്ക്രീനിൽ തെളിഞ്ഞ പേര് കണ്ട് അവന്റെ ചുണ്ടിൽ ഒരു പുഞ്ചിരി വിരിഞ്ഞു .
‘​’ ജാൻവിക്കുട്ടി ”
​ഫോൺ എടുത്തു ചെവിയിൽ വെച്ചതും മറുതലയ്ക്കൽ നിന്നും ഒരു തേങ്ങൽ കേട്ടു .
​” ആദിയേട്ടാ… “
​ആ വിളിയിൽ എല്ലാമുണ്ടായിരുന്നു . ഇന്നോളം അവൾ പറയാത്ത ഇഷ്ടവും , നന്ദിയും , പിന്നെ അവനില്ലാതെ തനിക്ക് പറ്റില്ലെന്ന സത്യവും . ആദി കണ്ണുകൾ ഇറുക്കിയടച്ചു . അവന്റെ പ്രണയം വിജയിച്ചു തുടങ്ങുകയായിരുന്നു , പുഴയുടെ ആഴങ്ങളിൽ നിന്നും ജീവിതത്തിന്റെ തീരത്തേക്ക് അവൻ അവളെ മാത്രമല്ല , അവരുടെ പ്രണയത്തെ കൂടി കൈപിടിച്ചു കയറ്റിയിരിക്കുന്നു .

തുടരും …..

---

📖 കഥ തുടരാം

“ജീവംശമായ്”ന്റെ അടുത്ത അധ്യായങ്ങൾ
അക്ഷരത്താളുകളിൽ വായിക്കൂ →

CONTINUE READING

---

📱 അക്ഷരത്താളുകൾ ആപ്പിൽ വായിക്കൂ

• ✓ കൂടുതൽ സൗകര്യപ്രദമായ വായന
• ✓ പുതിയ അധ്യായങ്ങൾ കണ്ടെത്താം
• ✓ ഏകദേശം 7 MB മാത്രം

OPEN ANDROID APP

---

✍️ എഴുതി വരുമാനം നേടൂ

നിങ്ങളുടെ കഥകളും നോവലുകളും അക്ഷരത്താളുകളിൽ പ്രസിദ്ധീകരിക്കൂ. വായനക്കാരിലേക്ക് എത്തിച്ച് നിങ്ങളുടെ എഴുത്തിലൂടെ വരുമാനം നേടാം.

ഇപ്പോൾ എഴുതിത്തുടങ്ങൂ →

---

✍️ UMMUFARHATH-ന്റെ കൂടുതൽ കഥകൾ →