ഈ സായാഹ്നം നമുക്കായി മാത്രം – 1

9842 Views

aksharathalukal sayaanam namukai mathram

കോടമഞ്ഞ് പുതപ്പിട്ട് നിൽക്കുന്ന കൊടൈക്കനാലിന്റെ മനോഹാരിതയിലേക്ക് ഉറ്റുനോക്കി , ഹോട്ടൽ ഡിലൈറ്റ്സിന്റെ വിസിറ്റിംഗ് റൂമിൽ , ഗ്ലാസ് ഭിത്തിയോട് ചേർന്ന് ദയാമയി നിന്നു … ഇടക്കിടക്ക് റിസപ്ഷനിസ്റ്റുമായി സംസാരിച്ചു നിൽക്കുന്ന അരുണിനെ അവൾ മുഖം തിരിച്ചു നോക്കുന്നുണ്ടായിരുന്നു … പിന്നിലേക്ക് ക്ലീപ് ചെയ്ത് വച്ച മുടിയഴിച്ച് , വിരൽ കടത്തി ഒന്ന് കൂടി ഒതുക്കി ,വീണ്ടും ക്ലിപ്പ് ചെയ്ത് വച്ചു .. എന്നിട്ടും അനുസരണയില്ലാതെ മുഖത്തേക്ക് അടർന്നു വീണ മുടിയിഴയെ അവൾ ഗൗനിച്ചില്ല …

അവൾ തന്റെ ശ്രദ്ധ കൊടൈക്കനാലിന്റെ ദൃശ്യവിരുന്നിലേക്ക് കേന്ദ്രീകരിച്ചു .. കൊടൈക്കനാൽ എന്നും മധുരപ്പതിനേഴുകാരിയെപ്പോലെ സുന്ദരിയാണെന്ന് ദയാമയി മനസിലോർത്തു .. കഴുത്തിലൂടെ ചുറ്റിയിട്ടിരുന്ന സ്കാർഫിൽ ഇടതേ വിരൽ കൊണ്ട് ചുറ്റിയും അഴിച്ചും അവൾ വിദൂരതയുടെ സൗന്ദര്യം ആസ്വദിച്ചു …

തണുപ്പിന് ശക്തിയേറി തുടങ്ങിയിരുന്നു .. അവൾ റിസപ്ഷനിലെ ക്ലോക്കിലേക്ക് നോക്കി .. ആറ് മണി കഴിഞ്ഞിരിക്കുന്നു … നേർത്തൊരു തൊണ്ടവേദന അവൾക്കനുഭവപ്പെട്ടു … തണുപ്പ് തന്നെ വളരെ വേഗം കീഴ്പ്പെടുത്തും .. പണി പാളല്ലേ എന്നവൾ പ്രാർത്ഥിച്ചു ….

” വാ പോകാം …….” വാലറ്റിലേക്ക് കാർഡ് വച്ചു കൊണ്ട് അരുൺ അവൾക്കടുത്തേക്ക് വന്ന് പറഞ്ഞു ..

” ഒക്കെയായോ …….” അവൾ ചോദിച്ചു ..

” ങും ….. രണ്ട് ദിവസം കൂടി നീട്ടിയെടുത്തു …. “

ദയാമയിയുടെ മുഖം വിടർന്നു … സൈഡിൽ ഒതുക്കി വച്ചിരുന്ന ബാഗ് എടുത്തു കൊണ്ട് അരുൺ മുന്നേയും , അവൾ പിന്നിലുമായി നടന്നു …

സെക്കന്റ് ഫ്ലോറിന്റെ ഇടനാഴിയിലൂടെ നടക്കുമ്പോൾ അവിടമാകെ നിറഞ്ഞു നിന്ന

ഏലക്കായുടേത് പോലെ അഭൗമമായൊരു ഗന്ധം അവൾ മൂക്കു വിടർത്തി വലിച്ചെടുത്തു …

അടഞ്ഞു കിടക്കുന്ന ചോക്ക്ലേറ്റ്‌ നിറമുള്ള മരവാതിലുകളും , ഭിത്തിയുടെ വെളുത്ത പെയിന്റിംഗും ഗംഭീരമായൊരു കോമ്പിനേഷനാണ് .. ഭിത്തിയിലങ്ങിങ്ങായി തടികൊണ്ട് തീർത്ത ചില ശിൽപങ്ങളുണ്ട് .. അർധനഗ്നാംഗിയായ ഒരു സ്ത്രീ ശിൽപത്തിന്റെ അംഗ ലാവണ്യത്തിലേക്ക് അവളുടെ കണ്ണുകളിടറി വീണു …

” വിടടാ….. എടാ ദുഷ്ടാ വിടാൻ ……………” ആരോ മലയാളം സംസാരിക്കുന്നത് കേട്ടപ്പോൾ അവൾ അറിയാതെ കാതോർത്തു .. അരുണും അത് ശ്രദ്ധിച്ചെന്ന് അവൾക്ക് തോന്നി …

തൊട്ടു മുന്നിലായുള്ള റൂമിൽ നിന്നാണ് .. ആ ഡോർ തുറന്നു കിടപ്പുണ്ടെന്ന് , ഡോറിലൂടെ ഇടനാഴിയിലേക്ക് വീണു കിടക്കുന്ന വെളിച്ചത്തിൽ നിന്ന് അവൾക്ക് മനസിലായി …

അതിനു മുന്നിലെത്തിയതും അവൾ ആ റൂമിലേക്ക് നോക്കി … പത്ത് പതിനെട്ട് വയസ് തോന്നിക്കുന്ന ഒരു പെൺകുട്ടി … ചൂരൽ കസേരയിലിരുന്ന് എന്തോ മറച്ചു പിടിച്ചിരിക്കുന്നു . അവളിൽ നിന്ന് അത് പിടിച്ചു വാങ്ങാൻ ശ്രമിക്കുന്നൊരു പയ്യൻ .. അവനൊരു പത്തിരുപത്തഞ്ച് വയസ് തോന്നിക്കും … തൊട്ടടുത്ത് അത് കണ്ട് കൈകൊട്ടിച്ചിരിക്കുന്ന മറ്റൊരു പെൺകുട്ടി … ആ രണ്ടു പെൺകുട്ടികൾക്കും ഒരേ പ്രായമാണെന്ന് തോന്നുന്നു … അടുത്ത നിമിഷം അവനാ പെൺകുട്ടിയുടെ കൈയിൽ നിന്ന് ബിയർ ബോട്ടിൽ പിടിച്ചു വാങ്ങി ..

” ഓ ……..” അവൾ ചുണ്ട് വക്രിച്ച് പിടിച്ചു ..

നിമിഷങ്ങൾക്കുള്ളിൽ ദയാമയിയുടെ കണ്ണിലൂടെ മിന്നി മാഞ്ഞ ദൃശ്യങ്ങളായിരുന്നു അതെല്ലാം .. ഏറ്റവും ഒടുവിലായി അവളാ കാഴ്ച കൂടി കണ്ടു .. ഡോറിന്റെ മറവിനപ്പുറം അതെല്ലാം ചിരിയോടെ ഫോണിൽ പകർത്തുന്ന മറ്റൊരു യുവാവിനെയും …

എന്ത് കൊണ്ടോ ആ കാഴ്ച മയിക്ക് ഇഷ്ടമായില്ല .. ഏതോ കോളേജ് സ്റ്റുഡൻസ് ആകുമെന്ന് അവൾ ഊഹിച്ചു ….

റൂം നമ്പർ 202 നു മുന്നിൽ അരുൺ നിന്നു ..

ആ നിമിഷം , മയിയുടെ കൈയിലിരുന്ന് ഫോൺ ചിലച്ചു .. അവൾ ഫ്ലാപ് മാറ്റി നോക്കി ….

അമ്മ കാളിംഗ് …….

അവൾ അരുണിനെ ഒന്നു നോക്കിയിട്ട് , കോൾ അറ്റൻഡ് ചെയ്ത് കാതോട് ചേർത്തു ….

” നീയിതെവിടെയാ മയീ .. ഞാനെത്ര വട്ടം വിളിച്ചു … ?” മറുവശത്ത് നിന്ന് അമ്മയുടെ പരിഭവം നിറഞ്ഞ സ്വരം അവളുടെ കാതിൽ വീണു …

ശരിയാണ് , ഇതിനോടകം അമ്മയൊരു പത്തുവട്ടം വിളിച്ചിട്ടുണ്ടാകും .. അപ്പോഴൊക്കെ താനാ കോൾ അവഗണിച്ചു …

” വർക്ക് ബിസിയാണമ്മാ ……..” അവൾ പറഞ്ഞു ….

” ഇത് ഞാൻ കേൾക്കാൻ തുടങ്ങിയിട്ട് , വർഷം മൂന്നായില്ലെ … “

അവൾ മിണ്ടാതെ നിന്നു …

” ഞാൻ വിളിച്ചതെന്തിനാണെന്ന് നിനക്കറിയാമല്ലോ ….”

” ങും …….” താത്പര്യമില്ലാത്ത മട്ടിൽ അവൾ മൂളി ….

” പതിനെട്ടാം തീയതി , എന്റെ മോളിവിടെ എത്തിയിരിക്കണം .. ഇതു വരെ വന്ന പ്രപ്പോസൽസ് ഉഴപ്പിയത് പോലെയല്ല .. ഇത് ഞാൻ തീരുമാനിച്ചതാ … പഴയത് പോലെ , തലേ ദിവസം വിളിച്ചിട്ട് , വരാൻ കഴിയില്ലമ്മ … ഇത് വിട്ടേക്ക് എന്ന് പറയാനാ നിന്റെ ഭാവമെങ്കിൽ ഞാനും ചിലതൊക്കെ തീരുമാനിച്ചിട്ടുണ്ട് ….” അമ്മയുടെ ശബ്ദത്തിലെ കർക്കശ്യം മയി തിരിച്ചറിഞ്ഞു ….

അവൾ റൂമിന് നേർക്ക് നോക്കി … അരുൺ അകത്തേക്ക് കയറി പോയിരുന്നു … കോറിഡോറിന്റെ എന്റിലായി ഒരു ബാൽക്കണിയാണ് …. അവൾ ആ ഭാഗത്തേക്ക് നടന്നു … ബാൽക്കണിയിലേക്കിറങ്ങാതെ കോറിഡോറിന്റെ കോർണറിലേക്ക് നീങ്ങി നിന്ന് അവൾ ഫോണിൽ സംസാരിച്ചു ….

അൽപം കഴിഞ്ഞപ്പോൾ , തൊട്ടു മുൻപ് കണ്ടതിൽ ബിയർ ബോട്ടിലുമായി പിടിവലി കൂടിയ പെൺകുട്ടിയും പയ്യനും അവൾക്ക് മുന്നിൽ കൂടി ബാൽക്കണിയിലേക്ക് നടന്നു … ആ പെൺകുട്ടിയെ അവൻ താങ്ങി നടത്തുന്നത് പോലെയാണ് അവൾക്ക് തോന്നിയത് … അവളുടെ കാലുകൾ നിലത്ത് ഉറയ്ക്കാത്തത് പോലെ …

ഒരുനിമിഷം ദയാമയി അത് ശ്രദ്ധിച്ചു … പിന്നെയും ഫോൺ സംഭാഷണം തുടർന്നു ..

ബാൽക്കണിയിലേക്കിറങ്ങിയ പെൺകുട്ടിയെ അവൻ പിന്നിൽ നിന്ന് കെട്ടിപ്പിടിച്ചു .. അവളുടെ കവിളിൽ ഉമ്മ വച്ചു … ഇടയ്ക്കെപ്പോഴോ അവന്റെ വിരലുകൾ അവളുടെ വസ്ത്രങ്ങൾക്കിടയിലൂടെ സഞ്ചരിച്ചപ്പോൾ ദയാമയി മുഖം തിരിച്ചു കളഞ്ഞു ..

അൽപ നേരം കൂടി സംസാരിച്ചിട്ട് , അവൾ ഫോൺ കട്ട് ചെയ്‌തു … പിന്നെ റൂമിന് നേർക്ക് നടന്നു … റൂമിലേക്ക് കയറാൻ നേരം അവൾ ഒരിക്കൽക്കൂടി ബാൽക്കണിയിലേക്ക് നോക്കി …

ഏതോ മായിക ലോകത്ത് വിഹരിക്കുന്ന പെൺകുട്ടി … അതിർവരമ്പുകളുടെ എല്ലാ സീമകളും ലംഘിച്ച് അവളാസ്വദിക്കുന്നത് പ്രണയമോ കാമമോ ….

” ദയാ …….” അരുൺ അകത്തു നിന്നു വിളിച്ചു …

” വരുന്നു …. ” പറഞ്ഞിട്ട് അവൾ അകത്തേക്ക് കയറിച്ചെന്നു …..

( തുടരും )

അമൃത അജയൻ

അമ്മൂട്ടി

 

അമൃത അയന്റെ മറ്റു നോവലുകൾ

Get all the Latest Online Malayalam Novels, Stories, Poems and Book Reviews at Aksharathalukal. You can also read all the Latest Stories in Malayalam by following us on Twitter and Facebook

aksharathalukal subscribe

പുതിയ നോവലുകളും കഥകളും ദിവസവും ഇന്‍ബോക്‌സില്‍ ലഭിക്കാന്‍ ന്യൂസ് ലെറ്റർ സബ്‌സ്‌ക്രൈബ് ചെയ്യാം

©Copyright work - All works are protected in accordance with section 45 of the copyright act 1957(14 of 1957) and shouldnot be used in full or part without the creator's prior permission

Leave a Reply