ഈ സായാഹ്നം നമുക്കായി മാത്രം – 4

8493 Views

aksharathalukal sayaanam namukai mathram

മയി തന്റെ കണ്ണുകൾ ഒന്നുകൂടി അടച്ചു തുറന്നു …

” ദൈവമേ ഈ മൊതലായിരുന്നോ അമ്മേടെ സർപ്രൈസ് ….” ദയാമയി അറിയാതെ പറഞ്ഞു പോയി ..

” എന്താ പറഞ്ഞെ ……” കിച്ച ചോദിച്ചു …

” ഒന്നൂല്ല …. വാ താഴേക്ക് പോകാം ….”

” ങും …. ങും ….. കണ്ടപ്പോ തന്നെ ചായകൊടുക്കാൻ തിടുക്കമായി ….” സ്വാതിയൊന്ന് താങ്ങി പറഞ്ഞു …

മയി അവളെ തുറിച്ച് നോക്കി …

” എന്തായാലും ഇനി ചായ കുടിക്കാതെ ഇതൊന്നും പോകില്ല … എന്നാപ്പിന്നെ അത് എത്രയും വേഗം നടക്കട്ടെന്ന് വച്ചിട്ടാ …” മയി കലിയോടെ പറഞ്ഞു …

കിച്ചയും സ്വാതിയും അന്തംവിട്ടു നിന്നു ..

താൻ പറഞ്ഞത് കുറച്ച് ഉച്ചത്തിലായിപ്പോയെന്ന് മയിക്കും തോന്നി …

” അതിന് ചേച്ചിയെന്തിനാ ഇങ്ങനെ ദേഷ്യപ്പെടുന്നേ …. ” കിച്ച തിരിച്ചും കലിപ്പിച്ചു ..

” ഒന്നൂല്ലേ …. ഒന്നിറങ്ങി വരാൻ പറ്റ്വോ ……” അവൾ തൊഴുതു പിടിച്ചു കൊണ്ട് ചോദിച്ചു …

” നടക്ക് …….” സ്വാതി പറഞ്ഞു …

അവർ സ്റ്റെപ്പിറങ്ങി താഴെ വന്നു … അപ്പോഴേക്കും ചായയും പലഹാരങ്ങളുമായി മനീഷയും യമുനയും സന്ധ്യയും കാത്തു നിൽപ്പുണ്ടായിരുന്നു …

” മോളിത് പിടിക്ക് ….” യമുനാ ദേവി അവളുടെ കൈയ്യിലേക്ക് ചായയടങ്ങിയ ട്രേ കൊടുത്തു …

അവൾ അമ്മയെ ഒന്ന് നോക്കി .. ആ മുഖത്ത് സന്തോഷം തിരതല്ലുന്നു .. ഒക്കെ കെട്ടുപോകാൻ അധികം സമയമില്ലെന്ന് അവളോർത്തു … അവൾക്കും വേദന തോന്നി … ഇയാളാണെന്നറിഞ്ഞിരുന്നെങ്കിൽ ആദ്യമേ തന്നെ ഒഴിവാക്കി വിട്ടേനെ … അല്ല തന്റെ ഭാഗത്തും തെറ്റുണ്ട് .. പ്രപ്പോസലിനോട് മുഖംതിരിച്ചു നിന്നപ്പോ പറ്റിയതാണ് … ആരാന്നറിയാൻ തനിക്ക് യാതൊരു ആകാംഷയുമില്ലായിരുന്നു …

” നടക്ക് മോളെ …..” മനീഷ പറഞ്ഞു …

അവൾ അമ്മയെ ഒന്നു കൂടി നോക്കിയിട്ട് ഹാളിലേക്ക് നടന്നു … മനീഷയും സന്ധ്യയും പലഹാരങ്ങളടങ്ങിയ ട്രേയുമായി ഒപ്പം ചെന്നു …

ഹാളിൽ നിഷിനും , അച്ഛൻ രാജശേഖറും അമ്മ വീണയും നിഷിന്റെ ജ്യേഷ്ടന്റെ ഭാര്യ ഹരിതയും അവരുടെ കുഞ്ഞ് അപ്സരയുമാണ് അതിഥികളായി ഉണ്ടായിരുന്നത് ..

ഹാളിനപ്പുറത്ത് കർട്ടൻ ചലിക്കുന്നത് കണ്ടപ്പോൾ എല്ലാവരുടേയും കണ്ണുകൾ അങ്ങോട്ടു തിരിഞ്ഞു …

ട്രേയുമായി മയിയായിരുന്നു മുന്നിൽ .. പൈൻ ഗ്രീൻ കളർ സിൽക് സാരി വിത്ത് റെഡ് ബ്ലൗസ് കോമ്പിനേഷനായിരുന്നു അവളുടെ വേഷം … അവളുടെ വെളുത്ത നിറത്തിന് ഏറ്റവും നന്നായി ഇണങ്ങുന്ന വസ്ത്രം … യമുനാ ദേവിയുടേതായിരുന്നു ആ സെലക്ഷൻ … സ്‌ട്രയ്റ്റൻ ചെയ്ത മുടിയെങ്കിലും , ചെവിയുടെ ഇരു വശത്തു നിന്നും പിന്നിലേക്കെടുത്ത് ക്ലിപ്പ് ചെയ്തു വച്ചിരുന്നു ….

കഴുത്തിൽ അധികം കനമില്ലാത്ത സ്വർണ ചെയ്ൻ ചേർന്നു കിടന്നു .. അറ്റത്തായി D എന്ന ഇംഗ്ലീഷ് ആൽഫബെറ്റ് പെന്റന്റും …

അതിഥികളുടെ മുഖത്തെ തെളിച്ചം വീട്ടുകാരെല്ലാം ശ്രദ്ധിച്ചു ..

അവൾ ചായകൊണ്ടു വന്ന് ടീപ്പോയിൽ വച്ചു .. ഒരു കപ്പെടുത്ത് നിഷിന് നേരെ നീട്ടി … അവന്റെ മുഖത്തേക്ക് നോക്കാൻ പോലും അവൾക്ക് തോന്നിയില്ല ..

എന്നാൽ അവന്റെ കണ്ണുകൾ ,തന്റെ നേർക്കു നീട്ടിപ്പിടിച്ചിരുന്ന സ്വർണ രോമരാജികൾ മയങ്ങുന്ന അവളുടെ വെളുത്ത കൈത്തണ്ടയിലായിരുന്നു … ഒരു ചെറു പുഞ്ചിരിയോടെ അവൻ അവളുടെ മുഖത്തേക്ക് നോക്കിക്കൊണ്ട് ചായ വാങ്ങി …

* * * * * * * * * * * * * * * * * * * *

” ഹരിമാമാ ഞാൻ പറയുന്നതൊന്ന് മനസിലാക്ക് … ചെറ്യച്ഛാ ചെറ്യച്ഛനെങ്കിലും ഒന്നു മനസിലാക്ക് …..” അവൾ ഹരിയുടെയും ദേവന്റെയും മുന്നിൽ നിന്ന് കെഞ്ചി ….

യമുനാ ദേവി സോഫയിലിരുന്ന് കരച്ചിലും പിഴിച്ചിലും തുടങ്ങിയിരുന്നു … അവരെ സമാധാനിപ്പിക്കാൻ മനീഷയും സന്ധ്യയും ശ്രമിച്ചു …

കിച്ചയും സ്വാതിയും സ്വരാജും വിഷണ്ണരായി അതെല്ലാം നോക്കി നിന്നു …

” ഹരിയേട്ടാ … ദേവേട്ടാ … നിങ്ങളിവളുടെ താളത്തിനൊത്ത് തുള്ളരുത് … അവൾക്ക് കല്ല്യാണത്തിന് സമ്മതമല്ല … അതിന് കള്ളകഥയുണ്ടാക്കി പറയുന്നതാ ഇതൊക്കെ …..”

” അമ്മേ ഞാൻ …….”

” വേണ്ട … നീയെന്നോട് ഒന്നും പറയണ്ട ….” അടുത്തേക്കു വന്ന മയിയെ യമുന തടഞ്ഞു നിർത്തി ….

” മോളെ …. നീ മറ്റാരെ കുറിച്ച് പറഞ്ഞിരുന്നെങ്കിലും ഞാൻ വീശ്വസിച്ചനേ … പക്ഷെ ഈ പയ്യനെ കുറിച്ച് …. മോളെ നീ വർക്കു ചെയ്യുന്ന ചാനലിൽ പോലും ഇന്നു വരെ ആ പയ്യനെ കുറിച്ച് എന്തെങ്കിലും മോശം വാർത്ത വന്നിട്ടുണ്ടോ …. ജോലിയിൽ ആത്മാർത്ഥതയുള്ള പയ്യനായതുകൊണ്ടല്ലേ സർക്കാര് തന്നെ അവനെ അങ്ങോട്ടും ഇങ്ങോട്ടും തട്ടിക്കളിക്കുന്നത് … “

” ചെറ്യച്ഛാ .. ചില ബിംബങ്ങളൊക്കെ ഒടഞ്ഞു വീഴാൻ വലിയ താമസമൊന്നുമില്ല .. അയാൾക്കിപ്പോ കിട്ടിക്കൊണ്ടിരിക്കുന്നത് മീഡിയ പബ്ലിസിറ്റിയാണ് … എന്നെപ്പോലെയുള്ള ജേർണലിസ്റ്റുമാർ വിചാരിച്ചാൽ ഉടഞ്ഞു വീഴാനുള്ളതെയുള്ളു ഇയാളുടെയൊക്കെ ഇമേജ് …”

” അതിന് വേണ്ടി നിങ്ങൾ എന്ത് കള്ളത്തരവും എഴുതി പിടിപ്പിക്കേം ചെയ്യും …. ” അതുവരെ മിണ്ടാതെ നിന്ന കിച്ച ഇടയ്ക്കു കയറി ഗോളടിച്ചു ..

മയിയുടെ വായടഞ്ഞ് പോയി ..

അവൾ കിച്ചയുടെ നേർക്ക് ചീറിക്കൊണ്ട് ചെന്നു..

” ദേ … നീയിതിൽ ഇടപെടണ്ട … “

എന്നിട്ട് എല്ലാവരെയും നോക്കിക്കൊണ്ട് പറഞ്ഞു …

” ഈ കാര്യത്തിൽ , നിങ്ങളാരെക്കാളും അയാളെ കുറിച്ച് അറിയാൻ പറ്റുന്നത് എനിക്കാണ് … നിങ്ങളിതുവരെ കണ്ടിട്ടുള്ള വ്യക്തിയല്ല നിഷിൻ രാജശേഖർ IAS … അയാൾക്ക് മറ്റൊരു മുഖമുണ്ട് .. വിത്തിൻ ടു മന്ത്സ് .. ഞാൻ നിങ്ങളെയത് ബോധ്യപ്പെടുത്തും …..”

” ശരി … സമ്മതിച്ചു .. അയാൾ കുഴപ്പക്കാരനാണ് … പക്ഷെ എന്തുകൊണ്ടാ മോളെ , ഇന്ന് വരെ നിങ്ങളുടെ കൂട്ടത്തിലുള്ള ഒരാൾക്ക് പോലും അയാളെ കുറിച്ച് യാതൊരു മോശം വാർത്തയും കിട്ടാതെ പോയത് .. അയാളോട് വിരോധമുള്ള പാർട്ടി ചാനലുകാർക്ക് പോലും ഇതുവരെ ഒന്നും കിട്ടിയിട്ടില്ല … “

” അയാളുണ്ടാക്കി വച്ചിരിക്കുന്ന ഇമേജ് ബിൽഡപ്പ് അതാണ് .. അത് മാത്രമല്ല , നിഷ്പക്ഷ ചാനലെന്നറിയപ്പെടുന്ന ഞാൻ വർക്ക് ചെയ്യുന്ന ചാനലിന്റെ തലപ്പത്ത് പോലും അയാൾക്ക് ഹോൾഡുണ്ട് … അതിന് വ്യക്തമായ തെളിവ് എന്റടുത്തുണ്ട് ഹരിമാമാ …..” അവൾ പറഞ്ഞു …

” ശരി .. എന്തോ ആകട്ടെ … നിനക്കിത് വേണ്ടെങ്കിൽ വേണ്ട … ഇനി ഇതിന്റെ പേരിൽ നിയോരോ കുഴപ്പങ്ങളിൽ ചെന്ന് ചാടണ്ട .. ആ വീട്ടുകാരെ വിളിച്ച് ഞങ്ങൾ സംസാരിക്കാം …… ” ഹരീന്ദ്രൻ പറഞ്ഞു

” ഹരിയേട്ടാ …….” യമുന ചാടിയെഴുന്നേറ്റു …

” ഇവൾടെ താളത്തിനൊത്ത് തുള്ളാനാണോ നിങ്ങൾ വന്നത് … ഇവളീ പറയുന്നതൊക്കെ നുണയാ … ലോകത്ത് ഇവള് മാത്രമാണോ സത്യസന്ധയായ ജേർണലിസ്റ്റ് … ദേവേട്ടാ ഇവളീ വിവാഹം മുടക്കാൻ ഓരോരോ കള്ളങ്ങൾ പറയുന്നതാ … എനിക്കത് അറിയാവുന്നത് കൊണ്ടാ , ഇവളോട് ആളാരാന്ന് പറയാതിരുന്നത് .. പറഞ്ഞിരുന്നെങ്കിൽ , ഇവൾ കള്ള തെളിവുകൾ ഉണ്ടാക്കിക്കൊണ്ട് വന്നേനെ ….” യമുന നിന്ന് കിതച്ചു …

മയിക്ക് സങ്കടം വന്നു …

” യമുനേ .. അവളിത്രയൊക്കെ പറയുമ്പോ …. ” .

” ഇല്ല ഹരിയേട്ടാ … എന്റെ മോളെ എനിക്ക് നന്നായിട്ടറിയാം … ഇനി ഞാനൊന്നും മറച്ചു വയ്ക്കുന്നില്ല ….. ഇവൾക്കൊരു അഫയറുണ്ടായിരുന്നു .. കോളേജിൽ ഇവൾടെ സീനിയറായിരുന്നു അവൻ . ഒരു പ്രത്യേക സാഹചര്യത്തിൽ വച്ച് അവന്റെ വിവാഹം നടന്നു .. അവനെയാരൊക്കെയോ പെടുത്തിയതാണെന്നൊക്കെ ഇവൾ പറയുന്നുണ്ട് … ഇവൾടെ മനസിലിപ്പോഴും അവനാ … അവന് വേണ്ടിയാ ഈ കള്ളങ്ങളൊക്കെ ഇവൾ പറയുന്നത് …”

എല്ലാവർക്കും അത് പുതിയൊരറിവായിരുന്നു ..

ദയാമയിയുടെ കണ്ണു നിറഞ്ഞു .. അമ്മ ഇപ്പോ ഇതെല്ലാം വിളിച്ചു പറയുമെന്ന് അവൾ ഒട്ടും പ്രതീക്ഷിച്ചില്ല …. അവൾ നിസഹായയായി നിന്നു …

” യമുന പറഞ്ഞതൊക്കെ സത്യമാണോ … ” ഹരീന്ദ്രൻ മയിയുടെ മുന്നിൽ വന്നു നിന്നു …

” ഹരിമാമാ … അത് …..”

” വിശദീകരണം വേണ്ട … ചോദിച്ചതിന് മാത്രം ഉത്തരം പറയുക …. “

” ഉവ്വ് …..” അവൾ സമ്മതിച്ചു ..

” ഒന്ന് കൂടി …. അവനിപ്പോഴും നിനക്കു വേണ്ടി കാത്തിരിക്കുകയാണോ ….”

മയിയുടെ നെഞ്ച് പെരുമ്പറ കൊട്ടി ..

” ഹരിമാമാ … അത് … കുറച്ചധികം പറയാനുണ്ട് … എല്ലാം അറിഞ്ഞിട്ട് …..”

” മയി … ചോദ്യത്തിന് മാത്രം ഉത്തരം പറയുക ….. നിനക്കു വേണ്ടി അവൻ കാത്തിരിക്കുന്നുണ്ടോ … നിന്നെ വിവാഹം ചെയ്യാൻ ഇനി അവന് കഴിയുമോ ….? “

” ചില കുരുക്കുകൾ എടുത്താൽ ചിലപ്പോൾ….”

” എന്താ ഒരു ചിലപ്പോൾ … ഉറപ്പുണ്ടോ ഇല്ലയോ ……..”

അവൾ തേങ്ങിപ്പോയി …

” മയീ…… ” ദേവൻ കടുപ്പിച്ചു വിളിച്ചു …

” എനിക്കറിയില്ല … എനിക്കറിയില്ല … പക്ഷെ അതൊന്നും കൊണ്ടല്ല ഞാനിത് വേണ്ടാന്ന് വച്ചത് … അമ്മക്ക് ഞാൻ വിവാഹത്തിന് സമ്മതം കൊടുത്തതാ ….”

” ഇനി നീ കൂടുതലൊന്നും പറയണ്ട … ഈ വിവാഹം നടക്കും … ഞങ്ങൾ നടത്തും … ഞങ്ങളെ മോൾക്ക് തോൽപ്പിക്കണമെങ്കിൽ , എല്ലാവരുടേയും മുന്നിൽ അപമാനിക്കണമെങ്കിൽ അതാവാം … ” ഹരീന്ദ്രൻ പറഞ്ഞു …

” ഒന്നുകൂടി അവളോട് പറഞ്ഞേക്ക് ഹരിയേട്ടാ … ഈ വിവാഹം നടന്നില്ലെങ്കി , ഞാനും ചിലത് തീരുമാനിച്ചിട്ടുണ്ട് … ജോലി രാജി വച്ച് ,ആശ്രമത്തിലേക്ക് പോകും ഞാൻ … എന്നെ അനുസരിക്കാൻ കഴിയാത്ത മക്കൾക്കൊപ്പം ഇനി ഞാനുണ്ടാവില്ല … ഇത് വെറും വാക്കല്ല … യമുനക്ക് തീരുമാനം ഒന്നേയുള്ളു ……”

” അമ്മേ …..” മയി അറിയാതെ വിളിച്ചു പോയി …

” അങ്ങനെ ഇനി എന്നെ വിളിക്കണമെങ്കിൽ , ഞാൻ പറയുന്നത് നീ അനുസരിക്കണം ….” യമുന കണ്ണു തുടച്ചു ..

മയി മുഖം പൊത്തി പൊട്ടിക്കരഞ്ഞു ..

” സമ്മതിക്ക് ചേച്ചി … ” കിച്ച മയിയുടെ കൈത്തണ്ടയിൽ പിടിച്ചു …

” എനിക്കെന്റെ അമ്മേ വേണം … ചേച്ചി സമ്മതിക്ക് … പ്ലീസ് ….. ” അവൾ കെഞ്ചി ….

എല്ലാവരുടെയും കണ്ണുകൾ അവളുടെ മുഖത്തായിരുന്നു … അവളുടെ ദയ കാത്ത് നിൽക്കുന്നത് പോലെ അവരെല്ലാം നിന്നു …

” നിങ്ങടെ ഇഷ്ടം നടക്കട്ടെ …..”

പറഞ്ഞിട്ട് പൊട്ടിക്കരഞ്ഞുകൊണ്ട് മയി മുകളിലേക്കോടി ….

* * * * * * * * * *

റൂമിൽ കയറി വാതിലടച്ച് അവളിരിക്കാൻ തുടങ്ങിയിട്ട് രണ്ട് മണിക്കൂറായി ….

സ്വാതിയും കിച്ചയും ഇതിനോടകം പല വട്ടം ആ വാതിൽക്കൽ വന്നു പോയി …

ഇത്തവണ അവർ രണ്ടും കൽപ്പിച്ച് മുട്ടി വിളിച്ചു ..

നാലഞ്ച് മിനിറ്റിനു ശേഷം ആ വാതിൽ തുറക്കപ്പെട്ടു ….

പാറി പറന്ന മുടിയും കരഞ്ഞു കലങ്ങിയ കണ്ണുകളും ചുവന്ന കവിളുമായി പ്രേതം പോലെ അവൾ നിന്നു….

കിച്ചയും സ്വാതിയും പരസ്പരം നോക്കി …

” ഇതെന്ത് കോലമാ ചേച്ചി …..” സ്വാതി ചോദിച്ചു ….

മയി ഒന്നും മിണ്ടാതെ ബെഡിലേക്ക് പോയി ഇരുന്നു …

” ചേച്ചിക്ക് അതൊക്കെ വെറുതെ തോന്നുന്നതാ … നിഷിനേട്ടൻ അങ്ങനൊരാളല്ല … ആ വീട്ടുകാരും എന്തു നല്ല ആൾക്കാരാ …..” കിച്ച പറഞ്ഞു ..

നിഷിനേട്ടനോ… അതിനിടക്കവൾ ഏട്ടനും ആക്കിയോ …. മയി മനസിൽ പറഞ്ഞു ..

” ശരിയാ …. എന്റെ കോളേജിലൊക്കെ എത്ര ഫാൻസാ നിഷിനേട്ടന് … എല്ലാരുടേം ഹീറോയാണ് ….. ” സ്വാതിയും വാചാലയായി …

അയ്യേ ….. ആ മരത്തലയനും ഫാൻസോ … എല്ലാം കൂടി ഞാൻ പൊളിച്ചടുക്കി കാണിച്ചു തരാം ..

” ചേച്ചി…. എന്താ തനിച്ച് തലകുലുക്കുന്നേ … ” കിച്ച ചോദിച്ചു ..

” എന്നാ നീ കൂടി കുലുക്ക് ഒരു കൂട്ടിന് ….. “

” നല്ല ഊള ചളി …..” കിച്ചയും വിട്ടില്ല …

സ്വാതി വാ പൊത്തിച്ചിരിച്ചു ..

” നീയിന്നലെ ക്ഷേത്രത്തിൽപ്പോയി എനിക്ക് വേണ്ടി എന്ത് പൂജ നടത്തിയെന്നാ പറഞ്ഞെ …. ?” മയി കിച്ചയോട് ചോദിച്ചു ..

” പുഷ്പാഞ്ജലി ……”

” ഹാ … എന്നാ ഇനി മുതൽ ഓരോ മൃത്യുഞ്ജയഹോമം കൂടി നടത്തിക്കോ …. ” പറഞ്ഞിട്ട് ടവ്വലുമെടുത്ത് അവൾ ബാത്ത്റൂമിലേക്ക് നടന്നു ..

( തുടരും )

അമൃത അജയൻ

അമ്മൂട്ടി

NB : മയിയുടെ ജീവിതം ഒരു വെല്ലുവിളിയാണ് .. നിങ്ങൾക്ക് മയിയെ ഇഷ്ടപ്പെട്ടോ ഇല്ലയോ എന്ന് അഭിപ്രായങ്ങളായി അറിയിക്കണെ…

 

അമൃത അയന്റെ മറ്റു നോവലുകൾ

Get all the Latest Online Malayalam Novels, Stories, Poems and Book Reviews at Aksharathalukal. You can also read all the Latest Stories in Malayalam by following us on Twitter and Facebook

aksharathalukal subscribe

പുതിയ നോവലുകളും കഥകളും ദിവസവും ഇന്‍ബോക്‌സില്‍ ലഭിക്കാന്‍ ന്യൂസ് ലെറ്റർ സബ്‌സ്‌ക്രൈബ് ചെയ്യാം

©Copyright work - All works are protected in accordance with section 45 of the copyright act 1957(14 of 1957) and shouldnot be used in full or part without the creator's prior permission

1 thought on “ഈ സായാഹ്നം നമുക്കായി മാത്രം – 4”

Leave a Reply