നിഷിൻ അനുജത്തിയെ മനസിലാകാതെ നോക്കി ….
മറ്റുള്ളവർക്കും അമ്പരപ്പ് ആയിരുന്നു .. വിവാഹം വാക്ക് പറഞ്ഞ് ഉറപ്പിച്ചു വന്നപ്പോൾ അവൾ പറയുന്നു അത് വേണ്ടെന്ന് ….
” വാവേ …. നിന്റെ കുറുമ്പ് കൂടുന്നുണ്ട് … ഇതെന്താ തമാശയാണോ ….?” വീണ ദേഷ്യത്തിൽ ചോദിച്ചു ..
” എനിക്കിഷ്ടായില്ല … അവളെ എനിക്കിഷ്ടപ്പെട്ടില്ല …..”
” എന്താ അതിന് കാരണം …..” നവീണാണ് ചോദിച്ചത് …
അവളൊന്ന് പതറി …
” എനിക്കവളെ ഇഷ്ടായില്ല .. ഏട്ടന് ഒട്ടും ചേരില്ല …. ” അവൾ വീറോടെ പറഞ്ഞു …
” ആ കുട്ടിക്ക് എന്താ ഒരു കുറവ് … ഞങ്ങൾക്കെല്ലാവർക്കും ഇഷ്ടപ്പെട്ടു .. നീയും അന്ന് ഫോട്ടോ കണ്ടിട്ട് ഇഷ്ടമായി എന്നല്ലേ ഹരിതയോട് പറഞ്ഞത് …..” വീണ അവൾക്കു മുന്നിൽ വന്നു നിന്നു …
നിവയുടെ നാവടഞ്ഞു … അവളാ സംഭവം ഓർത്തെടുത്തു … കൊടൈക്കനാലിലേക്ക് പോകാൻ വണ്ടിയിലിരിക്കുമ്പോഴാണ് ഹരിത ഫോട്ടോ വാട്സപ് ചെയ്തത് .. താനാ സമയത്ത് ഗ്യാലറിയിലെ വേണ്ടാത്ത ഫോട്ടോസൊക്കെ ഡിലീറ്റ് ചെയ്യുകയായിരുന്നു … കൊടൈക്കനാലിൽ നിന്ന് ഫോട്ടോസും വീഡിയോസും ഒരുപാട് എടുക്കാനുണ്ടാവും എന്നുള്ളത് കൊണ്ട് … അക്കൂട്ടത്തിൽ അതും ഡിലീറ്റായി … അപ്പോഴാണ് ഹരിതയുടെ കാൾ വന്നത് … രാത്രി ഏഴു മണി .. വണ്ടി സ്റ്റോപ് ചെയ്യിച്ചിട്ടാണ് ഹരിതയോട് സംസാരിച്ചത് .. വാഹനത്തിന്റെ ശബ്ദം കേൾക്കാതിരിക്കാൻ … ആ കോൾ പെട്ടന്ന് ഒഴിവാക്കാൻ വേണ്ടി ഫോട്ടോ ഡിലീറ്റ് ആയ കാര്യം മറച്ചു വച്ചു , ഇഷ്ടപ്പെട്ടന്ന് പറയുകയും ചെയ്തു …
” ഫോട്ടോയിൽ കണ്ട പോലെയല്ല . . നേരിട്ട് കണ്ടപ്പോ …” അവൾ പറഞ്ഞു ..
” അത് ശരിയാ … ഫോട്ടോയിലുള്ളതിനെക്കാൾ ഭംഗിയുണ്ട് നേരിട്ട് കാണാൻ … ” ഹരിത പറഞ്ഞു …
നിവ അവളെ തുറിച്ചു നോക്കി …
” നിവാ …. നിന്റെ കുട്ടിക്കളി മതിയാക്കി പോയേ …. നിശ്ചയിച്ചുറപ്പിച്ച കല്യാണം വേണ്ടത്രേ ……..” വീണ അവളെ വഴക്ക് പറഞ്ഞു …..
നിഷിൻ എല്ലാം കേട്ടിട്ടും അവളെ തന്നെ നോക്കി മിണ്ടാതെ നിന്നതേയുള്ളു ….
” ഈ കല്യാണം നടത്താനാ തീരുമാനമെങ്കിൽ ഞാനുണ്ടാവില്ല മാര്യേജിന് … ഞാൻ ഹോസ്റ്റലിൽ പോയി നിക്കും …” അവൾ തന്റെ ആവനാഴിയിലെ ബ്രഹ്മാസ്ത്രമെടുത്തു …
ഇത്തവണ എല്ലാവരും ഒന്നു നടുങ്ങി …
” കേട്ടില്ലേ രാജേട്ടാ ഇവൾ പറയുന്നത് … ഇവൾടെ കുഴപ്പം എന്താന്ന് ചോദിക്ക് ….” വീണ ഭർത്താവിനെ നോക്കി പറഞ്ഞു ..
” അമ്മേ …..” നിഷിൻ തടഞ്ഞു ..
” നീ മിണ്ടാതിരിക്ക് .. എല്ലാറ്റിനും നിങ്ങൾ മൂന്നാളും വളം വച്ചു കൊടുത്തിട്ടാ .. എത്ര നിസാരമായിട്ടാ അവളൊരു വിവാഹം വേണ്ട എന്ന് പറയുന്നത് … ” വീണക്ക് അരിശം അടക്കാനായില്ല …
” അമ്മേ .. അവളോട് ഞാൻ സംസാരിക്കാം … വെറുതെ സംസാരിച്ച് വഷളാക്കണ്ട ….” നിഷിൻ ഇടപെട്ടു …
” വാവേ … നീ പൊയ്ക്കോ …..” നിഷിൻ നിവയോടായി പറഞ്ഞു ..
അവളവനെ ഒന്ന് നോക്കി …
അവൻ ഒന്നു കൂടി പോകാൻ ആംഗ്യം കാണിച്ചു ….
അവൾ ഒന്ന് നിന്നിട്ട് മിണ്ടാതെ സ്റ്റെപ് കയറി പോയി ….
” ഇവളെന്താ ഇങ്ങനെയൊക്കെ പറയുന്നേ …. ” വീണ രാജശേഖർനെ നോക്കി …
” കുശുമ്പ് …. പെണ്ണല്ലേ ഇനം … തന്നേക്കാൾ സുന്ദരിയായ പെണ്ണിനെ കണ്ടപ്പോ ചെറിയൊരു കുശുമ്പ് ….” രാജശേഖർ പൊട്ടിച്ചിരിച്ചു …
എല്ലാവർക്കും അത് തന്നെയാവും കാരണം എന്ന് തോന്നി ….
” നീ വിഷമിക്കണ്ട … നമുക്ക് പറഞ്ഞു കോംപ്രമൈസ് ആക്കാം … ” നവീൻ വന്നു നിഷിന്റെ തോളിൽ തട്ടി ..
* * * * * * * * * * * * *
” അനിയത്തിക്ക് ഇച്ചിരി കുഴപ്പം കൂടുന്നുണ്ട് …. “
റൂമിൽ വന്നപ്പോൾ ഹരിത നവീനോട് വെട്ടിത്തുറന്നു പറഞ്ഞു …
” അവള് ചെറിയ കുട്ടിയല്ലേ … എന്തെങ്കിലും മണ്ടത്തരം പറയുന്നതാ .. ” നവീൻ നിസാരവത്കരിച്ചു …
” എന്തോ എനിക്കങ്ങനെ തോന്നിയില്ല … തീരെ ചെറിയ കുട്ടിയൊന്നും അല്ലല്ലോ .. പതിനെട്ട് വയസില്ലെ .. ഒരു മാര്യേജ് ഫിക്സ് ചെയ്തിരിക്കുന്നതിന്റെ സീരിയസ്നെസ് ഒക്കെ അവൾക്കറിയാം .. ഇത് വേറെന്തോ ആണ് … അവിടെ ചെന്ന് മയിയെ കണ്ടപ്പോൾ മുതൽ അവളുടെ മാറ്റം ഞാൻ ശ്രദ്ധിച്ചതാ …..”
” അത് അച്ഛൻ പറഞ്ഞതാ കാര്യം … ചെറിയൊരു കുശുമ്പ് …..”
” അപ്പോ നമ്മുടെ വിവാഹത്തിനും അവളിങ്ങനെ പറഞ്ഞിരുന്നോ…..”
” ഏയ് … അന്ന് അങ്ങനെയൊന്നും പറഞ്ഞില്ല … ” നവീൻ നിഷ്കളങ്കമായി പറഞ്ഞു …
” അതെന്താ … അതിനർത്ഥം എനിക്ക് അവളുടെ അത്ര പോലും ഭംഗിയില്ലെന്നാണോ …..” ഹരിതയുടെ മുഖം ചുവന്നു …
നവീന് അപ്പോഴാണ് ഹരിതയുടെ ചോദ്യത്തിലേയും തന്റെ മറുപടിയിലെയും കൊനഷ്ട് മനസിലായത് …
” എന്റെ പൊന്ന് ഹരിതേ .. ഞാനുദ്ദേശിച്ചത് അവൾക്ക് എന്നേക്കാൾ അടുപ്പം നിഷിനോടാണ് … ഞാനും വാവേം തമ്മിൽ 15 വയസിന്റെ ഡിഫറൻസ് ഉണ്ട് .. അവർ തമ്മിൽ പന്ത്രണ്ടും … ഇടക്ക് ഞാൻ സ്റ്റഡീസിന് ഹോസ്റ്റലിൽ ആയിരുന്നപ്പോ നിഷിൻ അവളുടെ കൂടെ നാട്ടിലുണ്ടായിരുന്നു … എന്തോ , പെട്ടന്ന് അവൻ അകന്ന് പോകും എന്നൊക്കെ തോന്നിയപ്പോൾ ഉള്ളൊരു ഫ്രസ്ട്രേഷൻ ആണവൾക്ക് … നീ കൂടി ചേർന്ന് വേണം അത് മാറ്റി എടുക്കാൻ .. വെറുതേ അവളോട് ഗുസ്തി പിടിക്കല്ലേ .. നീയവളുടെ അമ്മയുടെ സ്ഥാനത്താ… നീയവളെ കുറ്റപ്പെടുത്തരുത് .. പറഞ്ഞ് തിരുത്തി കൊടുക്കുകയാ വേണ്ടത് ” അവൻ ഹരിതയെ തിരുത്തി ..
” ഞാൻ വെറുതേ പറഞ്ഞതല്ലേ നവീണേട്ടാ… ഞാനവളെ അങ്ങനെ തന്നെയല്ലേ കണ്ടിട്ടുള്ളു … ” ഹരിത പെട്ടന്ന് വിഷയം മാറ്റി ….
അവൾക്കറിയാം അനുജത്തിയുടെ കാര്യം പറഞ്ഞ് ഏട്ടന്മാരോട് തർക്കിക്കുന്നത് വെള്ളത്തിൽ വരച്ച വര പോലെയാണെന്ന് … അത് കൊണ്ട് അവളാ വിഷയം വിട്ടു ..
* * * * * * * * * * * * * * * * * * *
സ്വാതിയും കിച്ചയും എന്തൊക്കെ ചോദിച്ചിട്ടും മയി അവരോടൊന്നും മിണ്ടിയില്ല ….
” ചേച്ചി എന്തിനാ ഞങ്ങളോട് മിണ്ടാതിരിക്കുന്നേ ……” സ്വാതി മുഖം വീർപ്പിച്ചു …
അലമാരയിലേക്ക് വസ്ത്രം മടക്കി വച്ചു കൊണ്ടിരുന്ന മയി , തിരിഞ്ഞ് അവളെ രൂക്ഷമായി നോക്കി … എന്നിട്ട് ജോലി തുടർന്നു …
” ശ്ശെടാ …. ഞങ്ങൾ തെറ്റായിട്ടെന്തെങ്കിലും ചെയ്തോ … ഇതെന്ത് കൂത്ത് ….” കിച്ചക്ക് ദേഷ്യം വന്നു ..
അവൾ ചെന്ന് മയി മടക്കി വച്ചിരുന്ന ഡ്രസ് വാരി കുടഞ്ഞിട്ടു …. മയിക്കത് കണ്ടപ്പോൾ വിറച്ച് വന്നു …
അവൾ കൈവീശി കിച്ചക്ക് ഒന്ന് കൊടുത്തു .. തോളിലേക്കാണ് കൈവീശിയതെങ്കിലും കൊണ്ടത് അവളുടെ കവിളത്തായിരുന്നു …
” ആ ………..” കിച്ച കവിൾ പൊത്തി നിലവിളിച്ചു കൊണ്ട് ബെഡിലേക്ക് കമഴ്ന്നു വീണു….
മയിയും പതറി പോയി … കരണത്ത് കൊള്ളുമെന്ന് അവൾ പ്രതീക്ഷിച്ചില്ല …
” കിച്ചേച്ചീ …..”
സ്വാതി ചെന്ന് കിച്ചയെ വലിച്ചെഴുന്നേൽപ്പിച്ചു … അവൾ കവിൾ പൊത്തിക്കൊണ്ട് എഴുന്നേറ്റിരുന്നു …
സ്വാതി അവളുടെ കൈ പിടിച്ച് മാറ്റി നോക്കി ….
” ദൈവമേ … ദേ തിണർത്തു …..” സ്വാതി അവളുടെ കവിളത്തു നോക്കി പറഞ്ഞു …
മൂന്നു വിരൽ പതിഞ്ഞു കിടക്കുന്നത് മയിയും കണ്ടു …. അവൾ നാക്ക് കടിച്ചു ..
” ചേച്ചി എന്ത് പണിയാ കാണിച്ചേ …” സ്വതി മയിയെ നോക്കി കലിപ്പിച്ചു …
” സോറി ……” മയി ആർക്കോ വേണ്ടി പറയുന്ന പോലെ പറഞ്ഞു …
കിച്ച അപ്പോഴും ഒന്നും മിണ്ടാതെ മയിയെ തുറിച്ചു നോക്കിയിരുന്നു …
” ചേച്ചിയെന്തിനാ ഞങ്ങളോട് ദേഷ്യപ്പെടുന്നേ .. “
” അയാളെങ്ങനെ അറിഞ്ഞു എന്റെ ഡ്രസിന്റെ കളർ .. പിന്നെ ചടങ്ങിനിറങ്ങിയപ്പോ നിങ്ങളെന്തിനാ അയാൾടെ അടുത്ത് ഇളിച്ചോണ്ട് പോയി നിന്നത് …….” മയി സ്വാതിക്കു നേരെ ചൂടായി ….
അതുവരെ കവിൾ പൊത്തിയിരുന്ന കിച്ച പോലും അത് കേട്ട് ചിരിച്ചു പോയി …
” എന്റെ പൊന്ന് ചേച്ചി , ആ ഹരിതേച്ചി അമ്മായിയെ വിളിച്ചിട്ടുണ്ടാർന്നു .. ചേച്ചീടെ ഡ്രസ് കളർ ചോദിക്കാൻ … ചേച്ചീടെ നമ്പറും വാങ്ങിയിരുന്നല്ലോ …. എന്നിട്ട് വിളിച്ചില്ലാരുന്നോ ..? “
” ആ .. എനിക്കറിയില്ല .. ഞാനിപ്പോ സേവ് ചെയ്തിട്ടുള്ള നമ്പേർസ് മാത്രമേ ഏടുക്കു … ബാക്കിയൊക്കെ പിള്ളേരെ കൊണ്ടാ എടുപ്പിക്കാ … പേർസണൽ ആണെങ്കിൽ ഞാൻ ഫ്ലോറിലാണെന്ന് പറയാൻ പറഞ്ഞിട്ടുണ്ടാരുന്നു …..”
” ആ ബെസ്റ്റ് ……” കിച്ച മതിയെ പുച്ഛിച്ചു …
” ആ വീട്ടുകാരെന്ത് വിചാരിക്കും ചേച്ചി ….”
“എന്ത് വിചാരിച്ചാലും എനിക്ക് ഒന്നൂല്ല … ” പറഞ്ഞിട്ട് അവൾ വീണ്ടും വസ്ത്രങ്ങൾ ഒന്നൊന്നായി മടക്കാൻ തുടങ്ങി …
* * * * * * * * * * * * * * * * * *
രാത്രി എല്ലാവരും ഭക്ഷണം കഴിക്കാനിരുന്നിട്ടും നിവ മാത്രം വന്നില്ല …
” മോളെവിടെ …..” രാജശേഖർ ചോദിച്ചു …
” വിളിച്ചിട്ടുണ്ട് ……”
” നീ പോയി വിളിച്ചിട്ട് വന്നേ …. “
കാത്തിരുന്നിട്ടും കാണാതായപ്പോൾ നവീൺ ഹരിതയോട് പറഞ്ഞു ….
അവൾ മുകളിലേക്ക് കയറിച്ചെന്നു …
” അവൾക്ക് വേണ്ടാന്ന് .. പിന്നെ ബാഗ് പാക്ക് ചെയ്യുവാ … നാളെ തിരിച്ചു പോകുവാന്ന് …..”
” അതിന് രണ്ട് ദിവസം കൂടി കഴിഞ്ഞിട്ടേ പോകൂ എന്നല്ലേ അവൾ പറഞ്ഞിരുന്നേ …..” നവീൺ ചോദിച്ചു …
” പിണങ്ങി പോകുവാ …….” ഹരിത പറഞ്ഞു …
എല്ലാവരിലും ഒരു നിശബ്ദത പടർന്നു …
നിഷിൻ പെട്ടന്ന് പ്ലേറ്റ് നീക്കി വച്ച് എഴുന്നേറ്റു …. പിന്നെ മുകളിലേക്കുള്ള സ്റ്റെപ്പ് കയറി …
( തുടരും )
അമൃത അജയൻ
അമ്മൂട്ടി …
അമൃത അയന്റെ മറ്റു നോവലുകൾ
About Author
Unlock Your Imagination: Start Generating Stories Now! Generate Stories
Get all the Latest Online Malayalam Novels, Stories, Poems and Book Reviews at Aksharathalukal. You can also read all the Latest Stories in Malayalam by following us on Twitter and Facebook
പുതിയ നോവലുകളും കഥകളും ദിവസവും ഇന്‍ബോക്‌സില്‍ ലഭിക്കാന്‍ ന്യൂസ് ലെറ്റർ സബ്‌സ്‌ക്രൈബ് ചെയ്യാം
Hey, I'm loving Kuku FM app 😍
You should definitely try it. Use my code LPLDM59 and get 60% off on premium membership! Listen to unlimited audiobooks and stories.
Download now
©Copyright work - All works are protected in accordance with section 45 of the copyright act 1957(14 of 1957) and shouldnot be used in full or part without the creator's prior permission